Mayın 21-də “ADA” Universitetində 2015-ci il məzunlarının buraxılış mərasimi keçirilib. Tədbirdə xarici işlər nazirinin müavini, “ADA” Universitetinin rektoru Hafiz Paşayev rəhbərlik etdiyi ali təhsil ocağı barədə məlumat verib, məzunları təbrik edib, uğurlar arzulayıb.

Bildirilib ki, bu il “ADA” Universitetindən məzun olan 32 gənc magistr dərəcəsi alıb. Onlardan 20-si Diplomatiya və Beynəlxalq Münasibətlər (MADİA), 12-si isə İctimai Siyasət (MPP) ixtisası üzrə təhsilini başa vurub. Məzunlardan 10-u əcnəbi gənclərdir.

Məzunlar arasında Tanzaniya, Macarıstan, Qana, Moldova, Türkmənistan, Pakistan, Keniya və Argentina vətəndaşlarının olduğunu bildirən rektor onların universitetdə Beynəlxalq Təqaüd Proqramı əsasında təhsil aldıqlarını qeyd edib.

Vurğulanıb ki, bu gün “ADA” Universiteti özünün nüfuzunu nəinki Azərbaycanda, həmçinin dünyada artırmaqdadır və bu işin sürətlənməsində məzunların xüsusi rolu var.

Hafiz Paşayev MADİA, MPP proqramları barədə məlumat verib. Bildirilib ki, “ADA” Universiteti təsis olunduğu vaxtdan bir çox layihələr həyata keçirməsinə baxmayaraq, bu proqramlar xüsusi əhəmiyyətə malikdir.

Tədbirdə Dövlət Neft Fondunun icraçı direktoru Şahmar Mövsümov çıxış edərək məzunlara gələcək fəaliyyətlərində uğurlar arzulayıb.

2015-ci il məzunları adından çıxış edən Banuçiçək Məmmədli mükəmməl təhsilə görə “ADA” Universitetinin rəhbərliyinə, müəllimlərə təşəkkürünü bildirib.

Sonda məzunlara diplomlar təqdim edilib.

AZƏRTAC