Lənkəran Dövlət Universitetində "Dayanıqlı inkişaf və idarəetmə" mövzusunda beynəlxalq elmi seminar-konfrans keçirilmişdir. Konfransdan əvvəl iştirakçılar universitetdə fəaliyyət göstərən Heydər Əliyev muzeyinin eksponatları ilə tanış olmuşlar.
Konfransı universitetin rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov açaraq bildirdi ki, Azərbaycanın dayanıqlı inkişafının əsasını təşkil edən Heydər Əliyev siyasəti dövlət başçısı İlham Əliyev tərəfindən uğurla davam etdirilir. Azərbaycanın öz inkişaf modeli yaradılmışdır. Bu model daim müzakirə olunur və öyrənilir.
Lənkəran Şəhər İcra Hakimiyyəti ictimai-siyasi məsələlər şöbəsinin müdiri Əlimərdan Əliyev şəhər rəhbərliyinin təbrikini çatdırdı və konfransın işinə uğurlar arzuladı.
Konfransda təbiətşünaslığın, humanitar elmlərin, dövlət idarəçiliyinin, iqtisadiyyatın dayanıqlı inkişafıyla bağlı müasir problemlərə dair məruzələr dinlənildi. Bu mövzuda çıxış edən Qafqaz Universitetinin rektoru, professor Əhməd Saniç, Azərbaycan Turizm Universitetinin rektoru, professor Cəfər Cəfərov, Moskva Dövlət Universitetinin professorları, fizika-riyaziyyat elmləri doktoru Anatoli Yaqola və kimya elmləri doktoru Gülnara Küramşina dayanıqlı inkişaf və dayanıqlı idarəetmənin müxtəlif elm sahələri tərəfindən daim öyrənildiyini bildirməklə yanaşı, həm də bu tədqiqatların nəzəri və praktik əhəmiyyətini təhlil etdilər.
Müzakirələrdə 2011-ci ilin dekabr ayında Lənkəran Dövlət Universitetində "Dayanıqlı inkişaf və idarəetmə: modellər, nəzəriyyə, praktika və perspektivlər" mövzusunda daha bir beynəlxalq elmi-praktik konfransın keçirilməsinin nəzərdə tutulduğu qeyd edildi. Təşkilat komitəsi bu istiqamətdə il boyu seminar-diskussiyalar keçirəcəkdir.
Konfrans öz işini gələn il baş tutacaq beynəlxalq konfransın təşkilinə dair tövsiyələr hazırlamaqla yekunlaşdırdı.

Ə.NƏCƏFXANLI, "Xalq qəzeti"nin bölgə müxbiri