Nəsimi rayonunda Beynəlxalq Müəllimlər Günü münasibətilə tədbir keçirilib.
Nəsimi Rayon İcra Hakimiyyəti və Azərbaycan Təhsil İşçiləri Azad Həmkarlar İttifaqı Nəsimi Rayon Komitəsinin təşkil etdikləri tədbiri rayon icra hakimiyyətinin başçısı Nəsib Məhəməliyev açaraq təhsil işçilərini təbrik etdi və onlara bu şərəfli fəaliyyətlərində uğurlar arzuladı. O bildirdi ki, son illər ölkəmizdə bütün sahələrdə olduğu kimi, təhsildə də böyük inkişafa nail olunub. Azərbaycanda təhsilin səviyyəsi artır, yeni, müasir tələblərə cavab verən təhsil müəssisələri inşa edilir və bu sahədə çalışan insanların əmək haqları mütəmadi olaraq artırılır.
Əvvəlki illərdə olduğu kimi, 2009-2010-cu tədris ilində də Nəsimi rayonunda bu sahədə nailiyyətlər əldə edilib.5 və 164 nömrəli məktəblər "İlin ən yaxşı ümumtəhsil məktəbi" müsabiqəsinin, 13 müəllim isə "Ən yaxşı müəllim" müsabiqəsinin qalibi olmuşlar.
Bu il rayon məktəblərini bitirmiş 1031 nəfər ali məktəblərə qəbul olunmuşdur. Onlardan 47-si 600-dən, 15-i isə 650-dən yuxarı bal toplamışdır. Son beş il ərzində rayondakı 29 məktəbdən 10-da yeni korpuslar inşa edilmiş, 9 məktəbdə isə əsaslı təmir işləri aparılmışdır.
Sonra bir qrup təhsil işçisinə əldə etdikləri uğurlara və rayonun ictimai həyatındakı fəaliyyətlərinə görə Nəsimi Rayon İcra Hakimiyyətinin fəxri fərmanları təqdim edildi. Tədbirdə respublikamızın incəsənət ustalarının iştirakı ilə maraqlı konsert proqramı nümayiş etdirildi.

Ayaz HƏMİDOĞLU, "Xalq qəzeti"