Bakı Ali Neft Məktəbində (BANM) tələbələrin üçüncü elmi-texniki konfransı keçirilib. Plenar iclasda BANM-ın rektoru Elmar Qasımov tədbirin ulu öndər Heydər Əliyevin anadan olmasının 92-ci ildönümünə həsr edilməsinin bu dahi insanın şəxsiyyətinə böyük hörmət və ehtiramın ifadəsi olduğunu bildirib.

Ümummilli lider Heydər Əliyevin həyat və fəaliyyətinin müxtəlif aspektləri, dahi şəxsiyyətin siyasi irsi, dövlətçilik fəlsəfəsi və azərbaycançılıq məfkurəsi, xalqımız və dövlətimiz qarşısında misilsiz xidmətləri barədə ətraflı məlumat verən Elmar Qasımov dahi şəxsiyyətin Azərbaycana rəhbərlik etdiyi illərin xalqımızın tarixinə qızıl hərflərlə yazıldığını diqqətə çatdırıb.

Ümummilli liderin siyasi xəttinin layiqli davamçısı Prezident İlham Əliyevin genişmiqyaslı fəaliyyəti nəticəsində Azərbaycanın beynəlxalq aləmdə nüfuzunun getdikcə artdığını vurğulayan BANM-ın rektoru ölkəmizdə həyata keçirilən sosial-iqtisadi layihələrdən, qazanılan uğurlardan ətraflı danışıb. O əldə edilmiş siyasi sabitliyi və davamlı inkişafı əhalinin maddi rifah halının daha da yaxşılaşdırılması məqsədilə həyata keçirilən tədbirlərin məntiqi nəticəsi kimi qiymətləndirib.

Konfransda iştirak edən ARDNŞ-in kadr, rejim və informasiya texnologiyaları üzrə vitse-prezidenti Xalik Məmmədov tələbələri konfransın açılışı münasibətilə təbrik edib və onlara konfransın işində uğurlar arzulayıb. O bildirib ki, ulu öndər Heydər Əliyev Azərbaycan dövləti və xalqının bütövlüyü uğrunda fədakarlıqla çalışıb, müstəqilliyimizin möhkəmləndirilməsi, dövlətçiliyimizin inkişafı, demokratiyanın genişləndirilməsi, xalqın rifah halının daha da yaxşılaşdırılması üçün mümkün ola bilən hər bir işi görüb. Sonra tələbələrin məruzələri dinlənilib.

Konfrans işini bölmə iclasları ilə davam etdirib. Sonda fərqlənən tələbələrə diplom və hədiyyələr təqdim olunub.

Vaqif BAYRAMOV,
“Xalq qəzeti”