Aprelin 2-də Strasburq Universitetinin prezidenti Alen Beretzin rəhbərliyi ilə Fransa ali təhsil müəssisələrinin rəhbərlərindən ibarət nümayəndə heyəti Azərbaycan Dövlət İqtisad Universitetində (ADİU) olub.

ADİU-nun rektoru, professor Ədalət Muradov qonaqlara universitet haqqında ətraflı məlumat verib. Bildirib ki, ADİU Azərbaycanın xaricdə filialı olan yeganə ali təhsil ocağıdır. Burada 18 mindən çox tələbə 4 dildə təhsil alır. Rektor Fransa ali təhsil ocaqlarında menecment ixtisasının daha yüksək səviyyədə tədris olunduğunu bildirərək, gələcəkdə ADİU-da Fransa-Azərbaycan menecment məktəbi yaratmağı təklif edib.

Strasburq Universitetinin prezidenti Alen Beretz iqtisadiyyat və menecment sahəsində araşdırmaların əhəmiyyətini qeyd edərək, iki universitet arasında tədqiqatçı mübadiləsinin vacibliyini vurğulayıb.

Görüşdə Fransa universitetləri ilə elmi-tədqiqat sahəsində qarşılıqlı əlaqələrin genişləndirilməsi, birgə əməkdaşlıq imkanları, ikili diplom və müəllim-tələbə mübadiləsi barədə müzakirələr aparılıb. ADİU və Fransa universitetlərində dərc olunan elmi jurnallarda hər iki tərəfdən olan alimlərin məqalələrinin dərcinin mümkünlüyü qeyd edilib.

Sonra Fransanın Ruen və Reims Şampan Arden universitetləri ilə ADİU arasında anlaşma memorandumu imzalanıb. Hər iki sənəddə universitetlər arasında tələbə-müəllim mübadiləsi və birgə təhsil proqramlarının təşkili nəzərdə tutulur.

Tədbirdə Fransanın Azərbaycandakı səfiri cənab Paskal Mönye və Strasburq Universitetinin prezidenti Alen Beretz SABAH tələbələri ilə görüşüblər. Səfir iki ölkə arasında təhsil sahəsində əlaqələrin genişləndirilməsindən danışıb və bu əməkdaşlığın inkişafına hərtərəfli dəstək göstəriləcəyini bildirib.

Sonra A.Beretz tələbələrə “Fransada ali təhsil və tədqiqat: xarici tələbələr üçün imkanlar” mövzusunda mühazirə oxuyub. Məruzəçi Fransanın ali təhsil sistemi, institusiyaları, yüksək keyfiyyətli tədqiqatlar, strategiyalar, tətbiq olunan yeniliklər barədə məlumat verib. Tədbirin sonunda tələbələri maraqlandıran suallar cavablandırılıb.

Elnarə ÖMƏROVA