Vyetnam Sosialist Respublikasının “VietSovPetro”  şirkətinin baş direktoru Tı Txan Ngianın rəhbərlik etdiyi nümayəndə heyəti martın 16-da Bakı Ali Neft Məktəbində (BANM) olub. Tədbirdə Bakı Ali Neft Məktəbi və “VietSovPetro” şirkəti arasında əməkdaşlıq haqqında anlaşma memorandumu imzalanıb.

BANM-ın rektoru Elmar Qasımov çıxış edərək Azərbaycan və Vyetnam arasındakı əlaqələrin tarixindən danışıb. Bildirib ki, iki ölkə arasında təməli ulu öndər Heydər Əliyev tərəfindən qoyulan təhsil sahəsində ikitərəfli əməkdaşlıq bu gün Azərbaycan Prezidenti İlham Əliyevin rəhbərliyi altında uğurla inkişaf etdirilir.

E.Qasımov qeyd edib ki, BANM və VietSovPetro şirkəti arasında qurulan əməkdaşlıq bakalavriat və magistratura səviyyələrində müxtəlif ixtisaslar üzrə yüksək ixtisaslı mühəndislərin hazırlanmasına, korporativ təhsilə, Vyetnam tələbələrin Bakı Ali Neft Məktəbində təhsil almasına, ixtisasartırmaya, kadr ehtiyatlarının inkişafı kimi vəzifələri uğurla həyata keçirməyə imkan verəcək.

Ulu öndər Heydər Əliyevin əvəzsiz xidmətlərini Vyetnam xalqının heç zaman unutmayacağını söyləyən Tı Txan Ngia Azərbaycanda olmaqdan məmnunluğunu ifadə edib.

“VietSovPetro” şirkətinin baş direktoru Vyetnam tələbələrin dövlət xətti ilə Azərbaycanda təhsil almasında ümummilli lider Heydər Əliyevin müstəsna rolunun olduğunu vurğulayıb. Bildirib ki, o, həmin tələbələrdən biri kimi Azərbaycanda neft-qaz mühəndisi ixtisasında təhsil alıb.

Tı Txan Ngia həmçinin Vyetnamın Vunq Tau şəhərində yerləşən şirkətin 1981-ci ildə təsis edildiyini bildirib. “VietSovPetro”nun Vyetnamı 80 faiz neft və qaz istehsalı ilə təmin edərək ölkənin Cənub Şərqi Asiyada neft sənayesi üzrə 3-cü yer tutmasına səbəb olduğunu söyləyib.

Azərbaycan Respublikası Dövlət Neft Şirkətinin (ARDNŞ) birinci vitse-prezidenti, akademik Xoşbəxt Yusifzadə Azərbaycan və Vyetnam əlaqələrinin böyük tarixə malik olduğunu deyib. Azərbaycanda Vyetnam üçün mütəxəssis hazırlığında hər zaman iştirak etdiyini söyləyən akademik BANM və “VietSovPetro” arasında imzalanan əməkdaşlıq haqqında anlaşma memorandumunun iki ölkə arasında əlaqələrin inkişafına töhfə verəcəyinə əminliyini bildirib.

Sonda Tı Txan Ngiana Bakı Ali Neft Məktəbində “Fəxri qonaq” diplomu təqdim edilib.

Vaqif BAYRAMOV,
“Xalq qəzeti”