Sentyabrın 28-də Türkiyənin Ankara Universitetinin prorektoru, professor Arqun Karacabeyin başçılıq etdiyi nümayəndə heyəti Bakı Dövlət Universitetində (BDU) olmuşdur.
Görüşdə BDU-nun rektoru, Milli Məclisin deputatı, akademik Abel Məhərrəmov rəhbərlik etdiyi ali məktəbin fəaliyyətindən, qazanılan nailiyyətlərdən danışmışdır.
Azərbaycanın Avropa təhsil məkanına - Bolonya prosesinə qoşulduğunu xatırladan akademik A.Məhərrəmov BDU-nun beynəlxalq əlaqələri barədə məlumat vermişdir. Rektor Azərbaycan ilə Türkiyənin təhsil sahəsində əməkdaşlığından danışaraq BDU-nun hüquq fakültəsinin məzunlarının, xüsusilə türkiyəli məzunların diplomlarının Türkiyədə tanınması məsələsinə toxunmuş və bu məsələnin həllinin əhəmiyyətini diqqətə çatdırmışdır.
Müasir qloballaşma şəraitində təhsilin mühüm rolunu vurğulayan Ankara Universitetinin prorektoru, professor Arqun Karacabey, hüquq fakültəsinin dekanı, professor Mustafa Akkaya Türkiyə-Azərbaycan təhsil əlaqələrinin əhəmiyyətindən, öz ölkələrində təhsilin inkişafı ilə bağlı həyata keçirilən tədbirlərdən bəhs etmişlər.
Sonra hüquq fakültəsini bitirən məzunların diplomlarının qarşılıqlı tanınması məsələsi ətrafında geniş müzakirələr aparılmış, təkliflər verilmişdir. Qeyd olunmuşdur ki, bu ixtisas üzrə tədris plan və proqramlarının uyğunluğu təkmilləşdirilməlidir.
Tədbirdə təhsil nazirinin müavini Elmar Qasımov, Türkiyənin Azərbaycandakı səfirliyinin təhsil müşaviri Halis Koyuncuoğlu iştirak etmişlər.
Türkiyəli qonaqlar Bakı Dövlət Universitetinin tədris şəraiti ilə də tanış olmuşlar.
AzərTAc{nl}