Martın 5-də Təhsil Nazirliyinin təşkilatçılığı ilə Azərbaycan Dövlət İqtisad Universitetinin (ADİU) SABAH qruplarında press-tur keçirilib. Jurnalistlər SABAH qrupları üçün yaradılan şəraitlə tanış olub, dərslərdə iştirak ediblər.

Təhsil Nazirliyinin SABAH qrupları layihəsi icra komitəsinin rəhbəri Elçin Ağakişiyev jurnalistlərə layihənin əhəmiyyətindən danışıb. Bildirib ki, layihənin əsas məqsədi bu qruplara seçilən tələbələrə tədrisin müasir tərz və metodika ilə keçirilməsidir. SABAH qruplarında dərs deyən bütün müəllimlər Təhsil Nazirliyinin komissiyasından keçiblər. Tədris planı elə qurulub ki,  burada intensiv ingilis dili keçilməklə yanaşı, dərslər xarici ölkələrdən gələn müəllimlər tərəfindən müvəffəqiyyətlə tədris edilir. Bu qruplarda təhsil alan tələbələr xüsusi təqaüd, ödənişsiz yataqxana və üç dəfə yeməklə təmin olunublar.

ADİU-nun SABAH qrupları mərkəzinin rəhbəri Aida Quliyeva universitetdə bu qruplar üçün yaradılan şəraitdən danışıb. Bildirib ki, SABAH qruplarında təhsil alan tələbələrə dərs prosesi xüsusi proqram əsasında təşkil olunur. İngilis dilinin və əsas fənlərin tədrisinə xüsusi yer verilir. Təhsil müddətində tələbələrin şirkət rəhbərləri, ictimaiyyət nümayəndələri, rəsmi şəxslərlə görüşləri təşkil edilir. Bu isə SABAH qruplarının tələbələrinin gələcək karyera və məşğulluq imkanlarını əhəmiyyətli dərəcədə artırır.

Elnarə ÖMƏROVA