“Azərbaycan günü” tədbirləri çərçivəsində Parisdə səfərdə olan Təhsil Nazirliyi və Azərbaycan ali təhsil müəssisələrinin rəhbər şəxslərindən ibarət nümayəndə heyəti fevralın 26-da Pyer və Mariya Küri Universitetində görüş keçirmişdir.

Təhsil Nazirliyindən aldığımız məlumatda deyilir ki, universitetin prezidenti Jan Şambaz Azərbaycan nümayəndə heyətinə məlumat verərək bildirmişdir ki, bu elm ocağında müxtəlif ixtisaslar üzrə 34 min tələbə təhsil alır, 100-ə qədər istiqamət üzrə elmi tədqiqat aparılır.

Universitetin nəzdindəki İntellektual Sistemlər və Robot Texnikası İnstitutunun direktoru Raja Şatila müəssisənin fəaliyyəti, aparılan elmi araşdırmalar, robot texnikası barədə təqdimatla çıxış etmişdir. R.Şatila universitet tərəfindən yaradılan robot texnikası nümunələrinə sənaye, tibb və farmokologiya kimi sahələrdə böyük tələbatın olduğunu, yalnız Fransanın deyil, Avropa miqyasında müxtəlif şirkətlərin universitetlə əməkdaşlıq etdiyini və elmi-tədqiqat layihələrini maliyyələşdirdiyini diqqətə çatdırmışdır.

Təhsil nazirinin müavini Firudin Qurbanovun rəhbərlik etdiyi nümayəndə heyəti ali təhsil müəssisəsinin, həmçinin, elmi-tədqiqat və robot hazırlığı laboratoriyalarının iş təcrübəsi ilə yaxından tanış olmuşdur.