Telekommunikasiya və İnformasiya Cəmiyyəti Gününə həsr olunan ali məktəb tələbələri arasında informatika üzrə Ümumrespublika Olimpiadasının birinci mərhələsi keçirilib. Ümumilikdə, qeydiyyatdan keçmiş 10 ali təhsil müəssisəsinin 42 komandasından ikinci final mərhələsinə 6 tədris ocağını təmsil edən 20 komanda vəsiqə qazana bilib.
Xatırladaq ki, ilk turda balların 30 faizini yığan komandalar final mərhələsinə adlayıblar. Finalda aşağıda qeyd olunan komandalar mübarizə aparacaq: Qafqaz Universiteti - 8 komanda; Moskva Dövlət Universitetinin Bakı filialı - 5 komanda; Bakı Dövlət Universiteti - 4 komanda; Azərbaycan Texniki Universiteti - 1 komanda; Azərbaycan Dövlət Neft Akademiyası - 1 komanda; Naxçıvan Dövlət Universiteti -1 komanda.
Builki olimpiadanın birinci mərhələsində respublikanın regionlarından iştirak edən komandaların artması ilə yanaşı yadda qalan hadisələrdən biri də, olimpiada tarixində ilk dəfə olaraq, tədbirə birinci dəfə qatılan və 5 komanda ilə iştirak edən Moskva Dövlət Universitetinin Bakı filialının bütün komandalarının final mərhələsinə vəsiqə qazanmasıdır.
Olimpiadanın final mərhələsi 8 may 2010-cu il tarixində AMEA-nın İnformasiya Texnologiyaları İnstitutunda olacaq. Qeyd edək ki, Olimpiada informatika üzrə beynəlxalq komanda yarışlarının yarımfinalında Azərbaycanı təmsil edəcək komandanın seçimi və hazırlanması üçün imkan yaradacaq. Tədbirin sponsorları isə hp şirkətinin Azərbaycan nümayəndəliyi, Sinam, Ultra, Bakcell, Azerfon, Detla Telecom və R.I.S.K şirkətləridir.{nl}

M. MÜKƏRRƏMOĞLU, "Xalq qəzeti"