“ADA” Universitetinin təhsilin idarə edilməsi fakültəsi və ABŞ-ın Miçiqan Universitetinin Təhsil Kolleci arasında əməkdaşlığa dair   anlaşma memorandumu imzalanıb.

“ADA” Universitetindən bildiriblər ki, memorandum bu ali məktəbdə yeni yaradılan fakültə üçün müasir tələblərə cavab verən tədris proqramlarının hazırlanmasını, yüksək ixtisaslı müəllim kadrların yetişdirilməsini, tələbə və müəllim mübadiləsini, birgə konfrans və seminarların təşkilini nəzərdə tutur.

İmzalama mərasimində iştirak edən Təhsil naziri Mikayıl Cabbarov “ADA” Universitetində yaradılmış fakültənin təhsilin idarə edilməsi sahəsində ixtisaslı kadrların hazırlanmasına, ölkəmizdə “Təhsilin inkişafı üzrə Dövlət Strategiyası”nın məqsədlərinə nail olunmasına kömək edəcəyinə əminliyini bildirib.

Vurğulanıb ki, Təhsil Nazirliyi tərəfindən dəstəklənən bu əməkdaşlıq ölkəmizdə təhsil sahəsindəki islahatlara töhfəsini verəcək.

Qeyd edək ki, fevralın 17-19-da Miçiqan Universiteti Təhsil Kollecinin dekanı Donald Heller və beynəlxalq proqramlar direktoru Todd Drummondun “ADA” Universitetinin rəhbərliyi, müəllimləri ilə görüşü keçirilib, ikitərəfli əməkdaşlıq və gələcək addımlar müzakirə olunub. Görüşdə “ADA” Universitetinin rektoru Hafiz Paşayev təhsil və tədqiqat sahələrində beynəlxalq əlaqələrin genişləndirilməsinin vacibliyini vurğulayaraq qeyd edib ki, bu əməkdaşlıq ikili dərəcə proqramlarının və birgə elmi araşdırmaların həyata keçirilməsinə yönəlməlidir.

Səfər çərçivəsində Bakı məktəblərinin müəllim və direktorları dekan Donald Hellerin “Müasir təhsilin meylləri” mövzusunda mühazirəsini dinləyib. Qonaqlar “ADA” Universitetindəki həmkarları ilə birgə Bakının 132-134 nömrəli Təhsil Kompleksini ziyarət edib, müəllimlərlə görüşlər keçirib.

AzərTAc