Bakı Ali Neft Məktəbi (BANM) ötən  tədris ili üçün tələbə qəbulunun əsas göstəricilərinə görə liderlik mövqeyini saxlayıb.

Belə ki, Tələbə Qəbulu üzrə Dövlət Komissiyasının sədri Məleykə Abbaszadə təhsil müəssisələrinin rəhbərləri və kütləvi informasiya vasitələrinin nümayəndələri üçün “Abituriyent” jurnalının 2014-cü ilin 12-ci sayında dərc olunmuş “2014/2015-ci tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrinin elmi-statistik təhlili”ni geniş şərh edib.

Məlumata əsasən, ali təhsil müəssisələrinə qəbul olmuş abituriyentlərin orta ballarına görə ən yüksək nəticələrə malik ali məktəblərin sıyahısında BANM qəbulda 668,017 orta balla birinci yerdədir. Elmi-statistik təhlildə, eyni zamanda, qeyd edilib ki, 1-ci qrup üzrə test imtahanlarında 600 və daha çox bal toplamış abituriyentlərin 24,69 faizi BANM-ə daxil olub. BANM-nin  Kimya mühəndisliyi ixtisasına qəbulda minimal bal 648, orta bal 657,327, Neft-qaz mühəndisliyi ixtisası üzrə müvafiq olaraq 660 və 671,880, Proseslərin avtomatlaşdırlması mühəndisliyi ixtisası üzrə isə 673 və 684,550 olub. Ən yüksək keçid balı Bakı Ali Neft Məktəbinin Neft-qaz mühəndisliyi (660) və Proseslərin avtomatlaşdırlması mühəndisliyi (673) ixtisaslarına qəbulda müşahidə edilib.

Bakı Ali Neft Məktəbi üzrə dövlət sifarişi əsasında qəbul planı 100 faiz yerinə yetirilib. Abituriyent ərizələrində ixtisasların birinci yerdə rastgəlmə tezliyinə görə də BANM üzrə göstərici də (81,39) yüksək olub. Sadalananlar BANM-nin  abituriyentlər üçün ən cəlbedici və nüfuzlu ali təhsil müəssisəsi olduğuna sübutdur.

Bu isə BANM-də mütəxəssis hazırlığının ən müasir proqramlar və mütərəqqi texnologiyalar əsasında həyata keçirilməsi, biliklərin qiymətləndirilməsində şəffaflığın və obyektivliyin təmin edilməsi, tədris prosesinin Azərbaycan Respublikası Dövlət Neft Şirkətinin (ARDNŞ) müəssisələrindəki və Bakıda fəaliyyət göstərən transmilli şirkətlərdəki istehsalat sahələri ilə sıx əlaqədə aparılması ilə bağlıdır.

Vaqif BAYRAMOV,
“Xalq qəzeti”