Azərbaycan Dövlət Aqrar Universitetində “Elektron universitet” layihəsinin uğurlu icrası, semestr imtahanlarının kompyüter vasitəsilə qəbulu tələbələrin biliyinin tam obyektiv qiymətləndirilməsinə, əlaçı adını qazanmış tələbələrin sayının artmasına səbəb olmuşdur.

Universitetdə tələbələrin təhsilə olan marağının daha da artırılması, onların asudə vaxtının səmərəli təşkili və respublikamızın gözəl güşələri ilə yaxından tanışlığı məqsədilə əlaçı adını qazanmış tələblərin rektorluğun təşəbbüsü, universitet Elmi Şurasının qərarı, habelə ictimai təşkilatların və kənd təsərrüfatında sahibkarlıq fəaliyyəti ilə məşğul olan bir sıra iş adamlarının dəstəyi ilə qış tətili təşkil edilmişdir. Belə ki, 2014/2015-ci tədris ilinin qış semestrinin imtahan sessiyasını əla qiymətlərlə başa vuran əyani təhsil forması üzrə 236 əlaçı tələbədən 53-ü öz arzusu ilə Azərbaycan Gəncləri Günü münasibəti ilə yeddi gün müddətində respublikamızın Qax və Zaqatala rayonlarının istirahət mərkəzlərinə qış tətilinə göndərilmişdir.

Universitetdə bu kimi tədbirlərin həyata keçirilməsinin nəticəsidir ki, əvvəlki imtahan sessiyası ilə müqayisədə cari imtahanlarda bakalavriat səviyyəsinin əyani təhsil formasında əlaçı tələbələrin sayı 49-dan 236-ya yüksəlmişdir. Gələcəkdə də bu kimi tədbirlərin davam etdirilməsi nəzərdə tutulmuşdur.

Hamlet QASIMOV,
“Xalq qəzeti” nin bölgə müxbiri