Azərbaycan Dövlət İqtisad Universiteti (ADİU) ilə Kolumbiya Universiteti arasında əməkdaşlıq müqaviləsi imzalanıb.

Müqaviləyə əsasən, ADİU tələbələri dünyanın ən nüfuzlu universitetləri sırasında yer alan Kolumbiya Universitetində bir semestr ərzində təhsil almaq, həmçinin 6 həftəlik yay məktəblərində iştirak etmək imkanı əldə edəcəklər.

ADİU tələbələrindən hər semestr maksimum 25 tələbə bu imkandan yararlana biləcək. Kolumbiya Universitetində təhsil alacaq tələbələrin təhsil göstəriciləri 71 baldan yuxarı, ingilis dili biliyi isə (minimum TOEFL 100 IBT və ya 7.0 IELTS) yüksək səviyyədə olmalıdır.

Kolumbiya Universitetinin məsləhətçiləri tələbələrə fənn seçimində yardım edəcəklər. Tələbələr semestr fənlərindən 4, yay məktəbində isə hər fənnə görə 2 kredit qazanacaqlar. Kreditlər ADİU tərəfindən tanınacaq və tələbələrin qiymət cədvəlində göstəriləcək.

ADİU tələbələri Kolumbiya Universitetinin tələbələri üçün nəzərdə tutulan bütün imkanlardan bərabərhüquqlu istifadə edəcəklər. Kolumbiya Universiteti tələbələrin ABŞ-a viza almasına və yerləşmə məsələlərinə kömək göstərəcək.

Müqaviləyə əsasən, ADİU tələbələrinə təhsil haqqında xüsusi güzəşt tətbiq olunacaq.

Elnarə ÖMƏROVA