Qırğız Respublikasının Təhsil və Elm naziri xanım Elvira Sariyeva ilə Azərbaycan Respublikasının həmin ölkədəki səfiri Hidayət Orucov arasında görüş keçirilmişdir.

Səfir naziri salamlayaraq, vəzifəyə təyin olunması münasibətilə onu təbrik etmiş, işlərində uğurlar arzulamışdır.

Nazir təbrikə görə təşəkkür etmiş və ölkələrimiz arasında uğurlu əməkdaşlığın bundan sonra da davam edəcəyinə əmin olduğunu bildirmişdir. E.Sariyeva qeyd etmişdir ki, azərbaycanlılar və qırğızlar qardaş xalqlardır və ölkələrimiz arasında münasibətlər daimi olaraq inkişaf etməkdədir.

O, həmçinin bu əməkdaşlığın inkişafında səfirliyin aktiv fəaliyyəti barədə məlumatlı olduğunu da bildirmişdir.

Səfir iki dövlət arasında təhsil sahəsində əməkdaşlıq haqqında saziş layihəsindən söz açaraq, yaxın bir zamanda həmin sənədin baxılıb imzalanmasının vacibliyini qeyd etmişdir.

Nazir bu məsələni öz nəzarətinə götürəcəyini bildirmişdir. O, hər iki ölkənin ali məktəbləri arasında əməkdaşlıqdan məmnunluğunu qeyd edərək, orta məktəblər arasında da əməkdaşlıqda maraqlı olduqlarını və bu sahədə təcrübənin yaxından öyrənilməsi üçün nazirliklər arasında görüşlərin keçirilməsinin vacibliyini bildirmişdir. E.Sariyeva həmçinin 2014-cü ildə Bakıya səfəri zamanı ADA Universitetində olduğunu və belə yüksək tədris müəssisəsinin qardaş Azərbaycanda yarandığı üçün qurur duyduğunu bildirmişdir.

H.Orucov qeyd etmişdir ki, qardaş ölkələr arasında təhsil sahəsində əməkdaşlığın yüksələn templə davam etməsi və münasibətlərimizin inkişafı ölkə başçılarımızın da maraq dairəsindədir.  

Görüşdə hər iki tərəfi maraqlandıran digər məsələlər müzakirə olunmuşdur.

“Xalq qəzeti”