Qazaxıstanın Elm və Təhsil Nazirliyi, Almatı fizika-riyaziyyat təmayüllü “İstedadlar” liseyi, “DARİN” Elm Mərkəzi  tərəfindən təşkil olunan olimpiadada 15 ölkədən 57 komanda iştirak etmişdir. Tədbirdə Azərbaycan 19 nəfərdən ibarət 3 komanda ilə təmsil olunmuşdur.

Təhsil Nazirliyindən aldığımız məlumatda bildirilir ki, 400-dək şagirdin qatıldığı olimpiadada komandalar riyaziyyat, fizika və informatika fənləri üzrə yarışmışlar. Azərbaycan məktəbliləri riyaziyyat və fizika fənləri üzrə uğurlu nəticələr göstərmişlər.

Riyaziyyat fənni üzrə keçirilən olimpiadada Bakı “İstək” liseyinin X sinif şagirdi Məhəmməd Şirinov II yeri tutaraq gümüş, Quba “İstək” liseyinin X sinif şagirdi Tahir Nadirov III yeri tutaraq bürünc medal qazanmışlar. Fizika fənni üzrə olimpiadada Quba “İstək” liseyinin IX sinif şagirdi Səbuhi Mikayılov III yerə çıxaraq bürünc medala layiq görülmüşdür.

Qeyd edək ki, “İstək” liseyi Təhsil Nazirliyi tərəfindən təsdiq olunmuş tədris planı əsasında, beynəlxalq proqramlar əlavə olunmaqla fəaliyyət göstərir və müntəzəm olaraq şagirdlərin bilik və məntiq olimpiadalarında iştirakını təmin edir.

Samirə ƏLİYEVA,
“Xalq qəzeti”