Həyatın bütün sahələrində olduğu kimi, təhsil sahəsində də sumqayıtlı gənclər böyük uğurlar qazanırlar. Şəhərdəki Uşaq və Yeniyetmələrin Yaradıcılıq Mərkəzində bu il yüksək balla tələbə adını qazanmış gənclərlə görüşdə bu fikir xüsusi vurğulanmışdır.
Tələbələri əldə etdikləri nailiyyətlərə görə təbrik edən Sumqayıt Şəhər Gənclər və İdman Baş İdarəsinin rəisi Musa Həsənov şəhər icra hakimiyyətində keçirilmiş analoji görüşdə də bu sahədə qazanılan uğurlardan ətraflı bəhs edildiyini diqqətə çatdırdı. O dedi ki, 109 sumqayıtlı abituriyentin ali məktəblərə qəbul imtahanlarında 600-dən çox bal toplaması, onlardan 36 nəfərinin 650 baldan yuxarı nəticəyə nail olması Sumqayıtı yenə də ölkə üzrə ən öncül mövqeyə çıxarmışdır. Bu il daha 7 sumqayıtlı tələbə Azərbaycan Prezidentinin təqaüdünə layiq görülmüşdür. Artıq bu yüksək təqaüdü alan tələbələrin sayı 59-a çatmışdır.
Natiq daha sonra ölkə və şəhər rəhbərliyinin xüsusi istedada malik olan gənclərə böyük diqqətindən, Sumqayıtda gənclərlə iş və idman sahəsində əldə edilmiş nəticələrdən danışdı. Maraq doğuran faktlardan biri ondan ibarət oldu ki, son səkkiz ildə ölkənin nüfuzlu ali məktəblərinə qəbul imtahanlarında 758 nəfər sumqayıtlı gənc 600-dən yuxarı bal toplamışdır. Bundan başqa, son səkkiz ayda dünya, Avropa çempionatlarında və mötəbər kubok yarışlarında Sumqayıt idmançıları 39 medal qazanmışlar ki, bunun da 13-ü qızıl əyarlıdır.
Qeyd edildi ki, baş idarədə tələbə-gənclərlə belə görüşlərin təşkili artıq gözəl ənənə halını almışdır. Bir qədər əvvəl baş idarədə xarici ölkələrin ali məktəblərinə qəbul edilmiş bir qrup sumqayıtlı gənclə də görüş keçirilmişdir. Musa Həsənov gənclərə tövsiyələr vermiş və onların təhsil aldıqları ölkədə Azərbaycanı layiqincə təmsil edəcəklərinə inamını bildirmişdir. Gənclərə verilən hədiyyələr arasında baş idarənin dörd dildə nəşr etdirdiyi "Erməni təxribatı: Sumqayıt hadisələri" kitabının olması Azərbaycan haqqında əsl həqiqətlərin dünyaya yayılması baxımından önəmlidir.
Görüşdə o da vurğulandı ki, bu il Sumqayıt məzunlarından 1330 nəfəri (41,3 faizi) müxtəlif ali məktəblərin tələbə biletlərini almışdır.
Tədbirdə çıxış edən tələbələr və valideynlər göstərilən diqqətə, yüksək nəticələrin qazanılması üçün yaradılan şəraitə görə ölkə və şəhər rəhbərliyinə, təhsil şöbəsinə, habelə görüşün təşkilatçısı olan Sumqayıt Şəhər Gənclər və İdman Baş İdarəsinə minnətdarlıqlarını bildirdilər. Sonda 600 baldan yuxarı nəticə göstərmiş hər bir tələbəyə baş idarənin hədiyyələri təqdim edildi.{nl}

Əli NƏCƏFXANLI, "Xalq qəzeti"