Bakı Ali Neft Məktəbində (BANM) “Microsoft” şirkəti tərəfindən informasiya texnologiyaları sahəsində yüksək ixtisaslı kadrların hazırlanması məqsədilə akademiya (Microsoft IT Academy) yaradılıb.

Burada  gələcəkdə bütün təhsil müəssisələrinin həm tələbə, həm də müəllimləri iştirak edə biləcəklər. BANM peşəkar biliklərin və bacarıqların mənimsənilməsi üçün tələbələri “Microsoft” şirkətinin yüksək keyfiyyətli təlim texnologiyaları ilə təmin olunacaq. Şirkətin sertifikatlaşdırma imtahanlarını uğurla verən tələbələr informasiya texnologiyaları sahəsində öz fəaliyyətlərini davam etdirəcəklər.

Akademiyanın hazırladığı proqramda iştirak bir neçə istiqamətdə səmərəlidir. Ali təhsil müəssisələrin məzunlarına rəqabət üstünlüyü, işəgötürənlərin investisiyalarının cəlb edilməsi, müəllimin vaxtına qənaət edilməsi və İKT sahəsində təhsil xidmətlərinin keyfiyyətinin yaxşılaşdırılması, proqram təminatına xərclərin azaldılması, daimi hüquqi lisenziya, İKT fənlərinin tədrisində səlahiyyətli yanaşmanın həyata keçirilməsi, tələbələrə əmək bazarındakı peşə tələblərinə uyğun təlimlərin təmin edilməsi və s. məsələlər nəzərdə tutulur.

Müəllimlərə əməliyyatların avtomatlaşdırılması sayəsində vaxta qənaət, kompleks təhsil sistemi və tələbələrlə birgə iş üçün interaktiv vasitələr, tədrisin səmərəliliyini artıran optimal öyrənmə mühitinin yaradılması, informasiya texnologiyaları sahəsində “Microsoft”un son məlumatlarına daimi müraciət ixtisaslaşmanı yüksək səviyyədə saxlamağı təminetmə imkanları verəcək.

Tələbələrə təlim yolu ilə əldə edilən bilik və bacarıqlar beynəlxalq sertifikat imtahanları verməyə şərait yaradacaq ki, bu da müasir cəmiyyətdə əmək fəaliyyətinə başlamaq üçün yaxşı bir başlanğıc olacaq, əldə edilən biliklər məzunlara özlərini sürətlə inkişaf edən informasiya texnologiyaları ilə zəngin müasir dünyada inamlı hiss etməyə imkan verəcək.

V. BAYRAMOV,
“Xalq qəzeti”