Ötən ilin son günündə Azərbaycan Tibb Universitetinin tələbələri arasında keçirilən “İlin ən yaxşı tələbə elmi tədqiqatçısı” adlı müsabiqəyə yekun vurulmuşdur. ATU-nun Tədris Terapevtik Klinikasında 31 Dekabr Dünya Azərbaycanlılarının Həmrəyliyi Gününə həsr olunmuş tədbirdə bu müsabiqənin final mərhələsi baş tutmuşdur.

Tədbirdə açılış nitqi ilə çıxış edən ATU-nun rektoru, millət vəkili  Əhliman Əmiraslanov əvvəlcə tədbir iştirakçılarını Dünya Azərbaycanlılarının Həmrəylik Günü və Yeni il münasibəti ilə təbrik etmişdir. Akademik Ə.Əmiraslanov çıxışında gənclərin elmə olan marağını daha da artırmağa  ehtiyac olduğunu vurğulamış və qeyd etmişdir ki, əslində, elmə həvəsi olan gənclərə bu yolda heç bir maneə ola bilməz.

ATU-nun rektoru universitetdə alimlər üçün yaradılan şəraitdən, elmi laboratoriyalarla bağlı gələcək planlardan da söz açmışdır: “Yaxın vaxtlarda AMEA-nın dəstəyi ilə Kök Hüceyrə mərkəzinin qurulması  planlaşdırılır. Qeyd etmək yerinə düşər ki, Azərbaycanda əczaçılıq fəaliyyətinin inkişafı üçün bitki xammalı var. Amma biz dərmanları adətən xaricdən alırıq. Dərman istehsalı üçün xüsusi laboratoriyalar olmalıdır. Əminəm ki, qarşıya qoyduğumuz məqsədə – bizim universitetin əczaçılıq fakültəsinin maddi texniki bazasının möhkəmləndirilməsinə nail olacağıq”.

Ə. Əmiraslanov müsabiqədə iştirak edənlərə uğurlar arzuladıqdan sonra müsabiqənin finalına start verilmişdir.

Tədbirdə çıxış edən ATU-nun elmi işlər üzrə prorektoru İbrahim İsayev müsabiqənin şərtləri, qaydaları, reqlamentlər haqqında məlumat vermişdir. Bundan sonra finalçılar öz təqdimatlarıyla çıxış etmişlər.

Qeyd edək ki, müsabiqənin ilk turunda hər fakültədən 1 tələbə seçilmişdir. Finalda məhz onlar  “Ən yaxşı tələbə elmi tədqiqatçısı” adı uğrunda mübarizə aparmışlar.

Müsabiqənin sonunda münsiflər heyətinin qərarı ilə müsabiqədə iştirak edən tələbələrdən 4 nəfəri mükafatlandırılmışdır.

Z. BƏŞİRQIZI,
“Xalq qəzeti”