Yunanıstanın Qərbi Makedoniya Texnoloji Təhsil İnstitutunun (QMTTİ) nümayəndələri Azərbaycan Dövlət İqtisad Universitetində olmuşlar.

 Yunanıstan nümayəndələri ilə görüşdən məmnunluğunu bildirən ADİU-nun rektoru, professor Ədalət Muradov qonaqlara universitet haqqında ətraflı məlumat verib. Onlara universitetin beynəlxalq əlaqələrindən danışıb. Bildirib ki, Azərbaycan mütəxəssisləri ilk dəfə olaraq xaricdə kadr hazırlığı prosesinə qoşulurlar. Həmçinin, Qərbi Makedoniya Texnoloji Təhsil İnstitutu ilə ADİU-nun professor-müəllim heyətinin birgə magistr hazırlığı həyata keçirəcəyi də nəzərdə tutulub. Rektor universitetin imicinin yüksəlməsi, professor-müəllim heyətinin peşəkarlığının daha da artırılması və dünya təcrübəsinin öyrənilməsi baxımından bu əməkdaşlığın önəmini vurğulayıb.

Qərbi Makedoniya Texnoloji Təhsil İnstitutunun prorektoru Siskos Evangelos  QMTTİ haqqında ətraflı məlumat verərək,  ADİU ilə əməkdaşlıqda maraqlı olduqlarını bildirib.

Sonra ADİU ilə Qərbi Makedoniya Texnoloji Təhsil İnstitutu arasında “Neft və qazın idarə olunması və nəqli” üzrə magistr proqramına dair beynəlxalq əməkdaşlıq memorandumu imzalanıb.

İmzalanan sənəddə universitetlər arasında tələbə və müəllim mübadiləsi, akademik əməkdaşlıq, təcrübə və informasiya mübadiləsi, konfransların, seminarların keçirilməsinə dair məsələlər öz əksini tapıb.  Həmçinin, Avropa qrant layihələri çərçivəsində birgə elmi tədqiqatların aparılması, qarşılıqlı mədəni əlaqələrin artırılması da sənəddə qeyd olunub.

Elnarə ÖMƏROVA