Yeni il ərəfəsində Yardımlı rayonunun üç kəndinin müəllim və şagird kollektivləri hədsiz sevinc hissləri yaşayıblar. Anzov, Urağaran və Çayüzü kəndlərində inşası yenicə başa çatmış məktəb binaları istifadəyə verilib. Yeni məktəblərin açılış mərasimləri kəndlərdə əsl bayrama çevrilib. 

Tikinti işləri “Exilles STS” MMC tərəfindən həyata keçirilib. Məktəblərin hər birində müasir idman zalı inşa olunub, istilik sistemləri quraşdırılıb. Təhsil ocaqları ümumilikdə 57 otaqdan, 32 sinifdən ibarətdir. Bütün otaqlar təzə avadanlıqla təhciz olunub.

Açılış mərasimlərində kəndlərin ictimaiyyət nümayəndələri ilə bərabər, rayon rəsmiləri də iştirak ediblər. Yardımlı  Rayon İcra Hakimiyyətinin başçısı Sevindik Hətəmov müəllim və şagirdləri yeni məktəb binalarının istifadəyə verilməsi münasibətilə təbrik edib. O deyib ki, respublikanın hər yerində, o cümlədən Yardımlı rayonunun təhsil sektorunda gedən inkişaf  regionlarının sosial-iqtisadi inkişafı üzrə Dövlət proqramılarının ardıcıl həyata keçirilməsinin nəticəsidir. Bu gün kəndlərimizə abad yollar çəkilir, infrastruktur yenilənir, əhalinin sosial-məişət problemləri həll olunur. Ucqarlarda muasir tələblər səviyyəsində məktəblərin tikilməsi isə dövlətimizin başçısı cənab İlham Əliyevin təhsilə olan diqqət və qayğısının bariz nümunəsidir.

 Tədbirlərdə kənd sakinləri, müəllimlər və şagirdlər də ürək sözlərini söyləyiblər. Vurgulanıb ki, genişmiqyaslı sosial layihələrin həyata keçirilməsi sayəsində şəhər, kənd və qəsəbələrin siması günbəgün dəyişir, əhalinin rifah halı daha da yüksəlir. Natiqlər yeni təhsil ocaqlarına, bütövlükdə təhsiilin inkişafına göstərdiyi daimi diqqətə görə Azərbaycan Prezidentinə dərin minnətdarlıq  duyğularını ifadə ediblər.

Sonda tədbir iştirakçıları məktəb binalarında yaradılmış şəraitlə tanış olublar.

Əli NƏCƏFXANLI,
“Xalq qəzeti”