Azərbaycanın hər yerində olduğu kimi, Qaxda da təhsil müəssisələri daim rayon rəhbərliyinin diqqət mərkəzindədir. Bu sahə ilə bağlı istənilən yenilik qeyd edilərkən rayon rəhbərləri təhsil işçilərinin, şagirdlərin yanında olurlar. Bu il - sentyabrın 15-də də belə oldu. Rayonun qabaqcıl, qocaman təhsil ocaqlarından olan şəhər 1 saylı orta məktəbində də həmin gün böyük qələbəlik hökm sürürdü.
Şagirdlər, müəllimlər, valideynlər, dəvət olunan qonaqlar məktəbin həyətindəki meydanda bir-birini yeni dərs ilinin başlanması münasibətilə təbrik edir, şənlənirdilər. Mərasimi məktəbin müəllimi Fətmət Rəşidova açdı.
Sonra məktəbin direktoru Mədinə Heydərova bu əlamətdar gün münasibətilə şagird və müəllim kollektivini, valideynləri təbrik edərək məktəbin uğurlarından danışdı, yeni dərs ilində zəngin ənənələrə malik bu qocaman təhsil ocağının qarşısında duran vəzifələrdən söz açdı. M.Heydərova on yaşlılar arasında şahmat üzrə dünya çempionu olmuş V sinif şagirdi Xanım Balacayevanı bu qələbə münasibətilə təbrik edərək ona məktəb rəhbərliyi tərəfindən qiymətli hədiyyə təqdim etdi. Məktəblilər öz sevinclərini tədbir boyu oxuduqları mahnılar, ifa etdikləri şeir və milli rəqslərlə ifadə etdilər.
40 il bu məktəbdə işləmiş qocaman müəllimə Tamam xanım, valideyn Oruc Məmmədzadə, rayon təhsil şöbəsinin nümayəndəsi Nazim Məmmədov və digərləri çıxış edərək bu əlamətdar gün münasibətlə məktəbin kollektivini, valideynləri, bütün təhsil ictimaiyyətini təbrik etdilər.
Rayon icra hakimiyyətinin başçısı Musa Şəkiliyev müasir dövrdə cəmiyyətimizin inkişafında təhsilin rolundan, ölkəmiz müstəqillik əldə etdikdən sonra ulu öndərimiz Heydər Əliyev tərəfindən bu vacib sahənin inkişafı üçün həyata keçirilən məqsədyönlü tədbirlərdən danışdı. Prezident İlham Əliyevin rəhbərliyi ilə ümummilli liderimizin təhsilin inkişafı istiqamətində başladığı islahatlar uğurla davam etdirilir. Natiq daha sonra rayonda zəngin təhsil ənənələrinin formalaşmasında, yüksək ixtisaslı kadr potensialının hazırlanmasında qocaman təhsil ocağı olan 1 saylı orta məktəbin rolundan danışdı. Bu məktəbin bir sıra məzunu elm, mədəniyyət, dövlət xadimi kimi respublikamızın ictimai-siyasi həyatında, elmin, təhsilin inkişafında fəal iştirak edir. Çıxışının sonunda M.Şəkiliyev əldə edilmiş uğurların möhkəmləndirilməsi, ənənənin davam etməsi üçün kollektivə öz dəyərli tövsiyələrini verdi, xoş arzularını çatdırdı, məktəbə RİH-in qiymətli hədiyyələrini təqdim etdi.
Tədbirdə Qax Bələdiyyəsi tərəfindən bir qrup məktəbliyə məktəb ləvazimatlarından ibarət hədiyyələr də təqdim olundu.
İlk zəngi iştirakçıların alqış sədaları altında məktəbin XI sinif şagirdi, dərs əlaçısı Qocalı Nəbi və I sinif şagirdi Diniyev Arxan səsləndirdi.
Mərasimdən sonra məktəblə hərtərəfli tanış olan RİH başçışı Musa Şəkiliyev məktəbin pedaqoji kollektivinin üzvləri ilə görüşərək onlarla səmimi söhbət etdi.

İ.MUSAOĞLU, "Xalq qəzeti"nin bölgə müxbiri