Azərbaycan Turizm İnstitutunda (ATİ) tarix üzrə fəlsəfə doktoru Ərəstun Mehdiyevin “Əsrin müqaviləsi”: Azərbaycan neft strategiyasının təməl daşı” monoqrafiyasının təqdimatı olub.

AzərTAc xəbər verir ki, tədbirdə ATİ-nin professor-müəllim heyəti, AMEA-nın A.Bakıxanov adına Tarix İnstitutunun əməkdaşları iştirak ediblər.

ATİ-nin rektoru, professor Cəfər Cəfərov monoqrafiyanın son dərəcə əhəmiyyətli bir mövzuya həsr olunduğunu qeyd edib, onun müasir tarixin öyrənilməsinə verdiyi töhfəni xüsusi vurğulayıb.

Kitab haqqında məruzə ilə çıxış edən AMEA-nın A.Bakıxanov adına Tarix İnstitutunun direktor müavini, professor Cəbi Bəhramov  monoqrafiyada işıqlandırılmış tarixi məqamların müstəqil Azərbaycanın həyatında mühüm rol oynadığını söyləyib. Bildirib ki, kitabda vurğulandığı kimi, 1994-cü ildə ulu öndər Heydər Əliyevin möhkəm iradəsi sayəsində bağlanmış “Əsrin müqaviləsi” müstəqil Azərbaycan iqtisadiyyatının bünövrəsini təşkil edir. Məhz ulu öndərin böyük səyləri nəticəsində çətinliklərin qarşısı alındı,  müstəqil ölkəmiz üçün müstəsna əhəmiyyət kəsb edən bu müqavilə imzalandı və reallaşdırıldı.

Monoqrafiyada həmin proseslər dərindən tədqiq olunub, ölkənin keçdiyi çətin proses ardıcıl işıqlandırılıb. Bu əsər Azərbaycanın müasir tarixinə dəyərli bir töhfədir.

ATİ-nin ictimai fənlər kafedrasının müdiri İbrahim Əliyev, şöbə müdiri Xaləddin İbrahimli, elmi katibi Məhərrəm Zülfüqarlı, AMEA-nın A.Bakıxanov adına Tarix İnstitutunun şöbə müdiri Qasım Hacıyevn çıxışlarında belə tədqiqatların davam etdirilməsinə ehtiyac olduğunu bildiriblər.