Dekabrın 4-də Azərbaycan Dövlət İqtisad Universiteti (ADİU) ilə Azərbaycan Türk Sənayeçi və İşadamları Beynəlxalq Cəmiyyəti (TUSİAB) arasında qarşılıqlı əməkdaşlıq haqqında müqavilə imzalanıb. İki tərəf arasında bağlanan müqavilənin məqsədi ölkə iqtisadiyyatının dinamik inkişafına cavab verə bilən, hərtərəfli kamil, rəqabətyönümlü yüksək ixtisaslı mütəxəssislərin hazırlanması üçün imkan və şərait yaratmaqdan ibarətdir.

Tədbiri giriş sözü ilə açan Azərbaycan Dövlət İqtisad Universitetinin rektoru, professor Ədalət Muradov bildirib ki, əməkdaşlıq çərçivəsində tələbələrin TUSİAB şirkətlərində təcrübə keçməsi və peşəkar bacarıqlara yiyələnməsi üçün şərait yaradılacaq. Cəmiyyət həmçinin, təhsilin idarəedilməsi sahəsində Türkiyə universitetləri ilə vasitəçilik edəcək.

TUSİAB İdarə Heyətinin sədri Yavuz Keleş çıxışı zamanı yaradılan şəraitə görə universitet rəhbərliyinə dərin minnətdarlığını bildirib və qarşılıqlı əlaqələrin gücləndirilməsi istiqamətində davamlı iş aparılacağını qeyd edib.

ADİU ilə TUSİAB arasında qarşılıqlı əməkdaşlığın əsas istiqamətlərinə kadr hazırlığı, birgə elmi simpozium, forum və konfransların təşkili, o cümlədən monoqrafiyaların, dərsliklərin, dərs vəsaitlərinin, metodiki tövsiyələrin hazırlanması, tələbələrin istehsalat təcrübəsi keçməsi və məzunların işlə təmin edilməsinə yardım göstərilməsi, ADİU-nun İnnovativ Biznes İnkubatoru ilə birgə layihələr (startaplar) təşkil edilməsi daxildir.

Görüşün yekununda ADİU ilə TUSİAB arasında qarşılıqlı əməkdaşlıq haqqında müqavilə imzalanıb.

Elnarə ÖMƏROVA