ADA Universiteti ilə İraq Xarici İşlər Nazirliyinin Diplomatik Xidmət İnstitutu arasında əməkdaşlıq haqqında Anlaşma Memorandumu imzalanıb.

Universitetdən AzərTAc-a bildirilib ki, memorandumu ADA Universitetinin rektoru Hafiz Paşayev və İraqın Diplomatik Xidmət İnstitutu adından bu ölkənin Bakıdakı səfiri Heydər Şiyə Qubeyşi Əl-Barrak imzalayıb.      

Sənədin imzalanmasında məqsəd iki ölkənin diplomatları və diplomatik xidmət işçiləri üçün daha yaxşı təhsil vermək və treninqlər təşkil etmək, eyni zamanda, onların tədqiqatlarına dəstək olmaq üçün qarşılıqlı əməkdaşlığın inkişaf etdirilməsidir. 

Memoranduma əsasən tərəflər təşkili nəzərdə tutulan dərs proqramları, kurslar, seminarlar və bu kimi akademik fəaliyyətlərlə bağlı məlumatları, hər iki təhsil müəssisəsi tərəfindən qəbul edilmiş tədris proqramlarında istifadə olunan müasir tədris metodikalarını, peşəkar göstəricilərin artırılması məqsədilə qarşılıqlı maraq dairəsində olan sahələrdə professorlar, mühazirəçilər, mütəxəssislər, tədqiqatçılar və tələbələri mübadilə etmək, müştərək dövri nəşrlər, jurnallar, məqalələr, elmi tədqiqatlar, eləcə də tərəflərin maraq dairəsində olan beynəlxalq münasibətlər sahəsindəki nəşrlərin mübadiləsi üçün müvafiq sistem yaratmaq haqqında razılıq əldə ediblər.