Azərbaycan Müəllimlər İnstitutunda (AMİ) görkəmli mütəfəkkir və ictimai xadim Abbasqulu ağa Bakıxanovun 220 illik  yubileyinə həsr olunan tədbir keçirilib.

AMİ-nin mətbuat və informasiya şöbəsindən AzərTAc-a bildiriblər ki, tədbirdə institutun rektoru, Milli Məclisin deputatı, professor Aqiyə Naxçıvanlı  Prezident İlham Əliyevin “Abbasqulu ağa Bakıxanovun 220 illik yubileyinin keçirilməsi haqqında” 2014-cü il 12 fevral tarixli sərəncamını xatırladıb, bu sənədin icrası ilə əlaqədar ölkədə bir sıra tədbirlərin həyata keçirildiyini bildirib. 

A.A.Bakıxanovun tarix elminə və ictimai həyata, Azərbaycan maarifçiliyinə verdiyi töhfələrin, xüsusilə gənclər arasında yaydığı maarifçilik ideyalarının əhəmiyyəti vurğulanıb. Rektor bildirib ki, A.Bakıxanov ensiklopedik biliyə, geniş dünyagörüşünə malik olmaqla yanaşı, yurdunu, xalqını, dilini sevən bir vətənpərvər idi.

Təbirdə ədibin həyat və fəaliyyətinə həsr olunan “Abbasqulu ağa Bakıxanovun mənzum əsərləri”, “Abbasqulu ağa Bakıxanovun varlıq nəzəriyyəsi”, “Abbasqulu ağa Bakıxanovun lirikası”, “Abbasqulu ağa Bakıxanovun bədii irsinin təlim-tərbiyədə rolu” və digər mövzularda məruzələr dinlənilib.

Tələbələr ədibin şeirlərini söyləyiblər.    

Tədbirdə A.Bakıxanovun həyat və yaradıcılığını əks etdirən slaydlar təqdim olunub.