Bu il Nəsimi rayonundakı İ.Əbilhəsənov adına 42 nömrəli ümumtəhsil məktəbində yeni tədris ilinin başlanması münasibəti ilə tədbir xüsusi təntənə ilə keçirildi. Buna səbəb tikintisi başa çatmış 2 yeni korpusun istifadəyə verilməsi idi.
Tədbiri rayon icra hakimiyyəti başçısı Nəsib Məhəməliyev açaraq məktəbin kollektivini və şagirdləri yeni tədris ilinin başlanması münasibətilə təbrik edib onlara uğurlar arzuladı. Məktəbin direktoru Firəngiz Həmidova ölkəmizdə təhsil sisteminin inkişafına və bu sahədə çalışan insanlara böyük diqqət və qayğıya görə dövlətimizin başçısı möhtərəm Prezidentimiz İlham Əliyevə dərin minnətdarlığını bildirdi. Milli Məclisin deputatı Asim Mollazadə və Bakı şəhəri üzrə Təhsil İdarəsi müdirinin müavini Məhəbbət Qarabağlı yeni tədris ili münasibətilə məktəbliləri və pedaqoji kollektivi təbrik etdilər.
Sonra yeni korpuslara baxış keçirildi. Müasir üslubda və yüksək zövqlə inşa edilmiş korpuslarda 200 yerlik 10 sinif otağı, dərsdən sonra hazırlıq üçün 3 otaq, akt və idman zalları vardır. Otaqların hamısı kompyuterlə və digər lazımi vasitələrlə təmin edilib. Yeni tədris ili ərəfəsində rayondakı məktəblərdə cari təmir işləri görülmüşdür. Qeyd edək ki, son 5 il ərzində rayon ərazisindəki 29 məktəbdən 10-da yeni korpuslar inşa edilmiş, 9 məktəb isə əsaslı təmir edilmişdir. Bu il ali məktəblərə 1031 nəfər qəbul olunub. Onlardan 47-si 600-dən, 15-i isə 650-dən yuxarı bal toplayıb.

Ayaz HƏMİDOĞLU, "Xalq qəzeti"