“bp-Azerbaijan” şirkətinin yeni təşəbbüsü Bakının orta məktəblərindən seçilmiş 200-ə yaxın yuxarı sinif şagirdini əhatə edir.Yüksək potensiala malik və texniki fənlərə maraq göstərən 8-10-cu sinif şagirdlərinin cəlb olunduğu təşəbbüs “Gənc Mühəndislərin İnkişafı” İctimai Birliyi tərəfindən həyata keçirilir.

Təhsil Nazirliyindən aldığımız məlumatda deyilir ki, təşəbbüs çərçivəsində məktəblilərə gələcək karyera istiqamətlərini seçməkdə kömək etmək məqsədilə bir sıra seminarlar təşkil olunmuşdur. Seminarlarda iştirakçılara peşəkar mühəndislərdən onların təcrübəsi və bilikləri haqqında geniş məlumat almaq, habelə bp-nin Azərbaycanda əməliyyatçısı olduğu layihələrdə mühəndislik sahəsindəki imkanlar barədə məlumat əldə etmək üçün əlverişli şərait yaradılmışdır.

Seminarların proqramı mühəndislik ixtisasları üzrə təqdimatlar, bp-nin təcrübəli mühəndislərinin karyeraları ilə bağlı maraqlı söhbətlər, interaktiv simulyasiya oyunları, habelə iştirakçılar üçün xüsusi tərtib edilmiş psixoloji və qabiliyyət testlərindən ibarətdir.

Seminarlar başa çatdıqdan sonra bütün iştirakçılara şəhadətnamələr, ən uğurlu şagirdlərə isə mükafatlar təqdim edilmişdir.

Samirə ƏLİYEVA,

“Xalq qəzeti”