Zaqatala rayonunun Çökəkoba kəndində yeni inşa olunmuş 160 yerlik məktəbin açılış mərasim keçirilmişdir.
Tədbirdə Zaqatala Rayon İcra Hakimiyyətinin başçısı Mübariz Əhmədzadə çıxış edərək Azərbaycan təhsilinin yüksək nailiyyətlər qazanmasında ulu öndər Heydər Əliyevin tarixi xidmətlərindən danışmış, Azərbaycan Respublikasının Prezidenti cənab İlham Əliyevin bütün sahələrdə olduğu kimi, təhsil sahəsində də göstərdiyi yüksək diqqət və qayğını xüsusi qeyd etmişdir. O, müəllim və şagirdləri yeni dərs ilinin başlanması münasibəti ilə təbrik etmiş, gənc nəslin təlim- tərbiyəsi işində pedaqoji kollektivə böyük uğurlar arzulamışdır.
Təhsil nazirinin müavini İsgəndər İsgəndərov çıxış edərək kadrların peşə hazırlığının artırılmasının, tədrisin keyfiyyətinin yüksəldilməsinin, dərs prosesində yeni texnologiyaların mənimsənilməsinin vacibliyini önə çəkmiş, tövsiyələrini vermişdir.
Məktəbin müəllimləri regionların, o cümlədən Zaqatalanın yaşayış məntəqələrində təhsil müəssisələrinin maddi-texniki bazasının möhkəmləndirilməsinə göstərdiyi yüksək qayğıya görə Azərbaycan Respublikasının Prezidenti cənab İlham Əliyevə və Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban xanım Əliyevaya öz dərin minnətdarlığını bildirmişlər.
Xüsusi layihə əsasında inşa edilmiş birmərtəbəli yeni məktəb binasında 11 sinif otağı, kitabxana və kompyuter otağı vardır. Məktəbdə müasir istilik sistemi quraşdırılmış, yeni su xətti çəkilmiş, yeni idman meydançası tikilmiş, tamet plitələr və asfalt döşənmiş, yaşıllıq zolağı salınmışdır.{nl}

İ.MUSAOĞLU, "Xalq qəzeti"nin bölgə müxbiri