Azərbaycan Turizm İnstitutu (ATİ) Biznes İdarəçiliyi fakültəsinin təşkilatçılığı və “AZINKA HR&CC Company”-nin məsul nümayəndələrinin iştirakı ilə “Karyeranın planlaşdırılması” mövzusunda seminar təşkil edilmişdir.

 İnstitutun mətbuat xidmətindən bildirmişlər ki, seminar bu ali təhsil ocağının biznes idarəçiliyi fakültəsinin tələbələri üçün nəzərdə tutulmuşdur.

Aktual mövzulu seminarda viznes idarəçiliyi fakültəsinin dekanı Sənan Əliyev, marketinq kafedrasının müdiri Anar Eminov, LC Waikiki Retail Az Limited Liability Company-nin işə qəbul üzrə mütəxəssisi Abid Səmədov, “AZINKA HR&CC”-nin insan resursları şöbəsinin rəisi Zaur Əliyev və Business Sevices Consulting şirkətinin icraçı direktoru Təranə Mahmudova iştirak ediblər. Səmimi söhbət və qarşılıqlı tanışlıq formatında təşkil olunan seminarda ATİ -nin bugünkü fəaliyyəti, məqsəd və vəzifələrindən də ətraflı danışılmışdır.

Şirkət təmsilçiləri Turizm institutunda “Karyeranın planlaşdırılması” mövzusuna həsr olunan seminarın təşkilindən  məmnun qaldıqlarını bildirmişlər. Belə formatda tədbirlərin vaxtaşırı  keçirilməsinə diqqət ayıracaqlarına, tələbələrin təcrübə semestrinin uğurlu təşkilinə və yerləşdirilməsinə  çalışacaqlarına, ən başlıcası  isə institutu bitirən məzunlarımızın işlə təminatına bilavasitə böyük dəstək olacaqlarına söz vermişlər.  Seminar başa çatdıqdan sonra Business Sevices Consulting şirkətinin icraçı direktoru Təranə Mahmudovaya “Tələbələrimizin bilik və bacarıqlarının artırılmasında göstərmiş olduğunuz təmənnasız xidmətə görə təşəkkür edirik” cümləsi yazılan plaket təqdim edilmişdir.

Z. HÜSEYNOVA,

“Xalq qəzeti”