15 sentyabr "Bilik Günü"ndə Yardımlı rayonundakı şəhid Alim Nəcəfov adına Ərus kənd orta məktəbinin açılışı oldu. Tədbiri Ərus kənd orta məktəbinin direktoru Eldəniz Məmmədov açaraq məktəbin tikilib istifadəyə verilməsində əməyi olan hər kəsə minnətdarlığını bildirdi.
Sonra kənd ağsaqqalı Sadiq Sadıqov, məktəbin qocaman müəllimi Ələşrəf Fərziyev və 10-cu sinif şagirdi Malik Talıbov çıxış edərək Prezident İlham Əliyevin təhsilə göstərdiyi qayğıdan danışdılar və minnətdarlıqlarını bildirdilər. Yardımlı Rayon İcra Hakimiyyətinin başçısı Xəzər Aslanov son beş ildə 48 belə məktəbin tikilərək şagirdlərin istifadəsinə verildiyini və hazırda daha 4 məktəbin tikintisinin davam etdiyini qeyd etdi. Kənd camaatını, müəllim kollektivini, şagirdləri yeni məktəbin açılışı münasibətilə təbrik edən natiq şagirdlərə yaxşı təhsil alıb vətənə, dövlətə layiqli vətəndaş kimi böyüməyi tövsiyə etdi.
Açılışdan sonra məktəbə baxış keçirildi. Ərus kənd orta məktəbi 360 yerlikdir, 28 otaqdan ibarətdir. Fövqəladə Hallar Nazirliyinin sifarişi ilə tikilən məktəbin smeta dəyəri 1 milyon 320 min manatdır. Məktəbdə 18 sinif otağı, fənn kabinələri, kitabxana, kompyuter otağı, idman zalı var, müasir istilik sistemi quraşdırılmışdır.
Rayonun Ləzir, Horavar, Osnağaran və Honuba kənd məktəblərində də son tamamlama işləri gedir.{nl}

Əli ƏLİYEV, "Xalq qəzeti"