AMİ-nin Qazax filialının professor-müəllim və tələbə kollektivinin iştirakı ilə 9 noyabr – Dövlət Bayrağı Günü ilə əlaqədar tədbir keçirildi. Əvvəlcə tədbir iştirakçıları tələbələrin qürurla dalğalandırdıqları bayraq cərgələrinin müşayiəti ilə Heydər Əliyevin abidəsini ziyarət edib, abidə önünə gül dəstələri qoydular. Daha sonra Gənclər Mərkəzində keçirilən tədbirdə dövlət himni səsləndirildi və Dövlət Bayrağı Günü ilə bağlı slayd təqdim edildi.

Tədbiri açıq elan edən filialın direktoru dosent Afaq Qasımova qonaqları və iştirakçıları salamladı. Sonra o, Dövlət Bayrağı Gününün yaranması tarixi ilə əlaqədar çıxış etdi.

Bayram təbriklərinə qoşulan Qazax Rayon İcra Hakimiyyəti başçısının müavini G. Həsənova çıxışında bu tarixi günü əlamətdar edən məqamlara diqqət yetirilməsinin vacibliyini vurğuladı.

Tələbələrdən Rövşən Bəkirov, Nicat Məmmədli, Sənəm Namazova, Cavid Cavadov müxtəlif dillərdə çıxış edərək, bayrağın dövlətin ictimai-siyasi və mədəni həyatında mühüm tarixi rol oynadığından gənclərin dövlət rəmzlərinə olan hörmət və ehtiramlarından söz açdılar.

Sonda mərasim iştirakçılarını bayram günü münasibətilə bir daha təbrik edən filialın direktoru dosent Afaq Qasımova Azərbaycan bayrağının işğal altında olan torpaqlarımızda dalğalanması arzusu ilə tədbiri yekunlaşdırdı.

H.QASIMOV,

“Xalq qəzeti”