“Baku Crystal Hall”da təşkil olunan və AzTV telekanalı ilə yayımlanan oyunda əvvəlcə yarışın oktyabr ayı üzrə finalında oynayacaq 4-cü komanda müəyyənləşdirilmişdir. Bu oyunun qalibi oktyabr ayının əvvəlki yarışlarının qalibləri olan “Nar Mobile”, “Allians” və “Aypara” ilə mübazirə aparmalı idi.

Təhsil Nazirliyinin mətbuat xidmətindən aldığımız məlumatda deyilir ki, dördüncü rəqibi müəyyənləşdirmək üçün finala çıxmayan komandaların təmsilçiləri arasında şans oyunu keçirilmişdir. Bu qarşılaşmada “Ağdaş” komandasının üzvü qalib gələrək komandasına ayın final oyununda iştirak etmək fürsəti qazandırmışdır.

Final mərhələsinin ilk seçim görüşündə “Ağdaş” və “Allians” qarşılaşmışdır. “Allians” 5-3 hesabı ilə rəqibini üstələmişdir. İkinci seçim mübarizəsində isə “Nar Mobile” və “Aypara” gərgin oyun nümayiş etdirmişlər. “Nar Mobile” bir xal fərqi ilə rəqibindən üstün olmuşdur.

Finalda “Nar Mobile” və “Allians” qarşılaşmışdır. Hər iki final görüşü 5-1 hesabı ilə birincinin xeyrinə başa çatmışdır. Bununla, “Nar Mobile” oktyabr ayının qalibi olmuş və “Bilik kuboku”nun finalında oynamaq hüququ qazanmışdır.   

Breyn-rinq yarışları ilin sonunadək davam edəcək və 15-ci oyunda “Bilik kuboku”nun sahiblərinin adları məlum olacaq. Həmin oyunda sentyabr, oktyabr və noyabr aylarının çempionları iştirak edəcəklər.

         Samirə ƏLİYEVA,
“Xalq qəzeti”