Azərbaycan Dövlət İqtisad Universitetinin rektoru, professor Ədalət Muradov universitetin imicinin,  təhsilin keyfiyyətinin yüksəldilməsi, məqsədilə ADİU-nun professor heyəti ilə görüş keçirib. Rektor yeni tədris ilində görülən işlərdən danışaraq, tətbiq olunacaq yeniliklər barədə məlumat verib.

Müəllim adının müqəddəs olduğunu diqqətə çatdıran  Ə.Muradov onların  əməyinə yüksək qiymət verildiyini vurğulayaraq bildirib ki, oktyabr ayından universitetin bütün əməkdaşlarının əmək haqları  15 faiz artırılıb. Müəllimlərin, xüsusilə professorların əmək haqlarının differensiallaşdırılaraq mütəmadi olaraq artırılacağı bildirilib. Bunun üçün kadr potensialının keyfiyyətinin yüksəldilməsi nəzərdə tutulub.

Görüşdə bir sıra aktual məsələlərə də toxunulub. Xüsusilə tədris prosesində yeni innovativ metodlardan istifadəyə diqqət yönəldilib. Rektor yazılı imtahana keçidlə bağlı məlumat verərək  bildirib ki, bu yenilik tədrisin keyfiyyətinə müsbət təsir edəcək. Tədrisin keyfiyyətinin artırılması məqsədilə Boloniya sisteminin tələblərinə əsasən, gələn ildən müəllimlər tələbələr tərəfindən seçiləcək.

ADİU-da yeni qüvvəyə minən “Tələbə və müəllimlərin universitetdaxili intizam qaydaları”na da toxunan rektor vurğulayıb ki, universitetdə qaydalara nəzarət komissiyası yaradılıb və qaydaları pozanlara qarşı müvafiq ölçü götürüləcək.

Universitetin professorları tətbiq olunan yenilikləri müsbət dəyərləndirərək, təhsilin keyfiyyətinin yaxşılaşdırılmasına dair təkliflər irəli sürüblər.

Görüşdə bildirilib ki, təhsilin keyfiyyətinin yüksəldilməsi istiqamətdə aparılan işlər bundan sonra da davam etdiriləcək. Əsas məqsəd kimi professor-müəllim heyəti arasında stimullaşdırıcı proseslərin daha da artırılması və keyfiyyətli təhsilin təmin edilməsi qeyd olunub. Hazırda ADİU-da 78 professor pedaqoji fəaliyyət göstərir.

Elnarə ÖMƏROVA