Şəhər mədəniyyət evində bu il ali məktəblərə qəbul olunmuş məzunlar, ölkədaxili və beynəlxalq yarışlarda yüksək nəticələr əldə etmiş idmançılarla görüş keçirilmişdir. Tədbir iştirakçıları öncə Heydər Parkında ümummilli liderimizin abidə kompleksini ziyarət etmiş, önünə tər çiçək dəstələri düzmüşlər. Görüşdə çıxış edən Zaqatala Rayon İcra Hakimiyyətinin başçısı Mübariz Əhmədzadə bu il tələbə adına layiq görülmüş məzunları, o cümlədən ölkə və beynəlxalq turnirlərdə yüksək nəticələr qazanmış idmançıları təbrik etmiş, onlara bundan sonrakı fəaliyyətlərində də uğurlar arzulamışdır.
Rayon rəhbəri dövlətimiz tərəfindən təhsilə və idmana göstərilən qayğıdan danışmış, bunun nəticəsi kimi ölkədə, o cümlədən Zaqatala rayonunda yeni-yeni təhsil ocaqlarının yaradılmasını, məktəblərin, idman meydançalarının tikintisini vurğulamışdır. Natiq ulu öndərimiz Heydər Əliyevin hakimiyyətə qayıdışından sonra təhsil sahəsində aparılan məqsədyönlü islahatlar nəticəsində müasir təhsil sisteminin əsasını qoyulduğunu tədbir iştirakçılarının diqqətinə çatdırmışdır.
Bundan başqa o, öz çıxışında dövlət başçısı İlham Əliyevin Milli Olimpiya Komitəsinin prezidenti seçildikdən sonra ölkə idmanının inkişafında yeni bir mərhələ başlandığını, bunun məntiqi nəticəsi kimi beynəlxalq səviyyəli idman turnirlərinin, olimpiadaların məhz Azərbaycanda keçirilməyə başlandığını qeyd etmişdir. Bu da öz növbəsində ölkə idmançılarının Azərbaycanı dünya ictimaiyyətinə tanıtmasında mühüm rol oynamasını təmin etmişdir.
Daha sonra M.Əhmədzadə Azərbaycan Respublikasının Prezidenti İlham Əliyevin ulu öndərimizin böyük quruculuq yolunu bütün sahələrdə olduğu kimi elm, təhsil və idman sahələrinin inkişafı istiqamətində də davam etdirdiyini nəzərə çatdırmışdır.
Qeyd edilmişdir ki, bu il Zaqatala rayonundan 629 məzun ali məktəbə sənəd vermiş, bunlardan 232 nəfəri tələbə adına layiq görülmüş, 13 nəfər isə 600-dən yuxarı bal toplamışdır.
Tədbirdə çıxış edən digər natiqlər respublikamızda təhsilə göstərdiyi yüksək diqqət və qayğıya görə Azərbaycan Respublikasının Prezidenti İlham Əliyevə və Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevaya öz dərin təşəkkürlərini bildirmişlər. Tədbirin sonunda 600-dən yuxarı bal toplamış 13 məzuna pul mükafatı, digər tələbə adını qazanmış məzunlara, o cümlədən yüksək nəticələr əldə etmiş 7 idmançıya qiymətli hədiyyələr təqdim olunmuşdur.{nl}

İ.MUSAOĞLU, "Xalq qəzeti"nin bölgə müxbiri