Nəsimi rayonunda Beynəlxalq Müəllim Günü münasibətilə tədbir keçirilib.

Nəsimi Rayon İcra Hakimiyyəti və Azərbaycan Təhsil İşçiləri Azad Həmkarlar İttifaqı Nəsimi Rayon Komitəsinin təşkil etdikləri tədbiri rayon icra hakimiyyəti  başçısının müavini Gülarə Verdiyeva açaraq təhsil işçilərini əlamətdar gün münasibətilə təbrik etdi və onlara şərəfli fəaliyyətlərində uğurlar arzuladı.

Bildirdi ki, son illərdə ölkəmizdə bütün sahələrdə olduğu kimi, təhsildə də böyük uğurlar əldə edilib. Azərbaycanda  təhsilin səviyyəsi ildən-ilə yüksəlir, müasir standartlara cavab verən təhsil müəssisələri inşa edilir, mövcud məktəblərdə təmir və bərpa işləri aparılır, bu sahədə çalışan insanların maddi rifah halının yüksəlməsi istiqamətində mütəmadi olaraq lazımi işlər həyata keçirilir.

2013-2014-cü tədris ilində Nəsimi rayonunda da bu sahədə yüksək nailiyyətlər əldə olunub. Bu il rayon məktəblərini bitirmiş 1118 nəfər ali təhsil müəssisələrinə qəbul olunmuşdur. Onlardan 44-ü 600-dən yuxarı, 12 nəfəri isə 650-dən yuxarı bal toplamışdır.

Müəllimlərin peşə bayramı ərəfəsində rayonun təhsil işçilərindən üç nəfəri “Əməkdar müəllim” adına layiq görülmüş, bir nəfər isə “Tərəqqi” medalı ilə təltif edilmişdir.

Sonra bir qrup təhsil işçisinə əldə etdikləri nailiyyətlərə və rayonun ictimai həyatındakı fəaliyyətlərinə görə Nəsimi Rayon İcra Hakimiyyətinin fəxri fərmanları təqdim olundu.

Tədbirdə Milli Məclisin deputatları Məlahət İbrahimqızı və Ziyad Səmədzadə iştirak edirdilər.

Respublikamızın tanınmış müğənnilərinin və H.Sarabski adına Mədəniyyət evi kollektivinin iştirakı ilə böyük konsert proqramı nümayiş etdirildi.

Ayaz HƏMİDOĞLU,

“Xalq qəzeti”