Sentyabrın 8-də Meksika Birləşmiş Ştatlarının ölkəmizə səfərə gəlmiş nümayəndə heyəti Azərbaycan Dillər Universtitetində (ADU) olmuşdur.
ADU-nun mətbuat xidmətindən bildirmişlər ki, nümayəndə heyətinin Azərbaycana rəsmi səfəri çərçivəsində keçirilmiş görüş zamanı təhsil sahəsində əməkdaşlıq məsələləri, o cümlədən ADU ilə Meksika universitetləri arasında əlaqələrin yaradılması imkanları müzakirə olunmuşdur.
Görüşdə çıxış edən ADU-nun beynəlxalq əlaqələr üzrə prorektoru, dosent Jalə Qəribova universitetin əldə etdiyi uğurlar haqqında danışmış və bu ali təhsil ocağının hər zaman digər ölkələrin universitetləri ilə münasibətlərin qurulmasında öndə getdiyini diqqətə çatdırmışdır.
Nümayəndə heyətinin üzvü Fernando Silva Nieto Meksika universitetləri ilə ADU arasında əməkdaşlığın yaradılmasında, xüsusilə dilçilik sahəsində münasibətlərin qurulmasında maraqlı olduqlarını bildirmişdir.
ADU-nun tədris işləri üzrə prorektoru, professor Natiq Yusifov universitetin dilçilik sahəsində əldə etdiyi uğurlar və tədris olunan dillər barədə qonaqlara ətraflı məlumat vermişdir.
Görüşdə çıxış edən Azərbaycanın Meksika Birləşmiş Ştatlarındakı səfiri İlqar Muxtarov universitetlərarası əlaqələrin təhsil sahəsində əməkdaşlığın genişləndirilməsində mühüm rol oynayacağını söyləmişdir.
Müzakirələr gələcəkdə əməkdaşlığın qurulması və birgə layihələrin həyata keçirilməsi barədə qarşılıqlı razılaşma ilə bitmişdir.
AzərTAc{nl}