Dünən Azərbaycan Dövlət Neft Akademiyasında Bilik Günü münasibətilə yüksək balla bu təhsil ocağına daxil olmuş birinci kurs tələbələri ilə görüş keçirildi. Tədbiri giriş sözü ilə açan ADNA rektoru, akademik Siyavuş Qarayev bildirdi ki, bu il respublikanın ali məktəblərinə 33623 nəfər daxil olmuş, onlardan 1657 nəfəri Azərbaycan Dövlət Neft Akademiyasının tələbəsi adını qazanmışdır.

Rektorun sözlərinə görə, ümummilli liderimiz Heydər Əliyevin işləyib hazırladığı və onun layiqli davamçısı, Prezident İlham Əliyevin uğurla həyata keçirdiyi neft strategiyası əfsanədən reallığa çevrilmişdir, Xəzərin neft-qaz ehtiyatları dünya bazarlarına nəql edilir. Belə bir vaxtda gənclərin peşə seçimində üstünlüyü Neft Akademiyasına vermələri təqdirəlayiqdir. “Ümummilli liderimiz Heydər Əliyev iki il Neft Akademiyasında təhsil almışdır. 30 ilə qədər SSRİ Neft Sənayesinə və Dövlət Plan Komitəsinə rəhbərlik etmiş, həmyerlimiz Nikolay Baybakov, SSRİ qaz sənayesi naziri, Sosialist Əməyi Qəhrəmanı Sabit Orucov, Rusiyanın bir çox bölgələrində neft-qaz yataqlarını kəşf edən, Sosialist Əməyi Qəhrəmanı Fərman Salmanov, Hindistan neftinin atası sayılan, üç dəfə SSRİ Dövlət Mükafatı laureatı Əyyub Tağıyev, kosmonavt Vitali Jolobov, Anqolanın Prezidenti Duş Santuş, “Lukoyl” şirkətinin Prezidenti Vahid Ələkbərov, Sovet İttifaqında kosmik uçuşlar üzrə dövlət komissiyasının sədri olmuş  general-leytenant, Sosialist Əməyi Qəhrəmanı Kərim Kərimov və yüzlərlə görkəmli dövlət və ictimai xadim, alim bizim təhsil ocağımızı bitirmişlər", – deyə Siyavuş Qarayev qeyd etdi.

Sonra birinci kurs tələbələrindən qəbul imtahanında 682 bal toplayaraq neft-qaz-mədən fakültəsinə daxil olmuş Rasim Həsənzadə, 652 bal toplayaraq istehsal proseslərinin avtomatlaşdırılması fakültəsinə daxil olmuş Elçin Məmmədov çıxış edərək Azərbaycanın ən qədim və şöhrətli ali təhsil ocağına daxil olmalarından qürur duyduqlarını bildirdilər və bütün birinci kurs tələbələrini təbrik etdilər. İqtisadiyyat, beynəlxalq iqtisadi münasibətlər və menecment fakültəsinin birinci kurs tələbəsi Orxan Hacıyevin atası “Bakıelektrikşəbəkə” ASC Suraxanı Rayon Enerji Təchizatı və Satışı İdarəsinin aparıcı mühəndisi Şəfayət Hacıyev çıxış edərək bildirdi ki, o, özü də Neft Akademiyasının məzunudur, oğlunun da bu ali təhsil ocağına daxil olması xəbərini böyük fərəhlə qarşılayıb. İnanır ki, onun övladı və digər tələbələr burada yüksək səviyyəli təhsil alaraq Azərbaycan üçün bacarıqlı kadrlar kimi yetişəcəklər.

Sonra rektor Siyavuş Qarayev birinci kurs tələbələrinə tələbə bileti və qiymət kitabçalarını təqdim etdi. Akademik yekun sözündə tələbələri  əmin etdi ki, onlar Neft Akademiyasını seçməklə gələcəkdə sərbəst düşüncəli, geniş dünyagörüşlü və ən əsası, dərin intellektli, mükəmməl şəxsiyyət kimi yetişəcəklər. Akademik S.Qarayev dedi: “Müstəqil Azərbaycanımız sizdən çox şey gözləyir, sizə ümid bəsləyir, gələcəyini sizə etibar edir. Bu gün respublikamızın iqtisadi və siyasi sahədə əldə etdiyi uğurları, beynəlxalq nüfuzu qoruyub saxlamaq və inkişaf etdirmək sizin əlinizdədir”.

Paşa ƏMİRCANOV, “Xalq qəzeti”