Yeni dərs ilinin ilk günü Lənkəran Dövlət Universitetinin tələbələri üçün bir sıra yeniliklərlə yaddaqalan olub.  Belə ki, sentyabrın 15-də universitetdə əsaslı təmir edilmiş böyük akt zalı, qızlar üçün 50 yerlik yataqxana, mini idman meydançası istifadəyə verilib.

Xatırladaq ki, bu il universitetdə  2100 nəfər  təhsil alacaq ki, onların da 605 nəfəri tələbə adını yenicə qazananlardır. Universitetin rektoru, fizika-riyaziyyat elmləri doktoru, professor Asəf İsgəndərov yeni dərs ilinin başlanması münasibətilə tələbələri təbrik edərək onlara elm və təhsildə uğurlar arzulayıb.

Tədbirdə Lənkəran Rayon Ağsaqqallar Şurasının sədri Kamal Kələntərli, universitet valideynlər şurasının sədri Sərhad Məmmədov, Milli Qəhrəman atası Ələkbər Əliyev çıxış edərək universitetdə elmə, təhsilə göstərilən diqqət və qayğıya görə minnətdarlıqlarını bildiriblər.  Universitetin kafedra müdiri, filologiya elmləri doktoru, dosent Yədulla Ağazadə, kimya-biologiya kafedrasının müdiri, biologiya elmləri namizədi Məmmədhüseyn Hüseynov  universitetdə hərtərəfli biliyə və savada malik peşəkar, vətənpərvər mütəxəssislər yetişdirmək sahəsində bundan sonra da səy göstəriləcəyini qeyd ediblər.

Daha sonra riyaziyyat və informatika müəllimliyi ixtisasına 639 balla qəbul olunmuş Leyla Nəzərli, Həzi Aslanov təqaüdçüsü Şəbnəm Əlizadə, “Tələbə yaradıcılığı” qrupunun üzvü Şəhla Adıgözəlova və başqaları çıxış edərək universitetin ictimai həyatında fəal iştirak edəcəklərinə söz veriblər.

Tədbirdə universitetə yüksək balla daxil olanların bir qrupuna tələbə bileti təqdim olunub.  Həmin gün universitetin birinci kurs tələbələrinin valideynləri ilə də görüş keçirilib. Rayonun təhsil müəssisələrinin və ictimaiyyət nümayəndələrinin iştirak etdikləri tədbir çərçivəsində valideynlər universitet həyatı ilə tanış olublar. Universitetin rektoru, professor A.İsgəndərov  tədbir iştirakçılarını maraqlandıran suallara cavab verib.

M. YAQUBZADƏ,

“Xalq qəzeti”