Sentyabrın 15-də Azərbaycan Dövlət İqtisad Universitetində Bilik Günü münasibətilə tədbir keçirilib.Tədbirdə əmək və əhalinin sosial müdafiəsi naziri, ADİU-nun fəxri məzunu, Səlim Müslümov, Təhsil Nazirliyinin Aparat rəhbərinin müavini Yaqub Piriyev və digər qonaqlar iştirak ediblər.

Mərasimi giriş sözü ilə açan universitetin rektoru, professor Ədalət Muradov yeni dərs ilinin başlanması münasibətilə tələbələri və professor-müəllim heyətini təbrik edib, onlara dərslərində müvəffəqiyyətlər arzulayıb. Rektor həmçinin qeyd edib ki,  Prezident İlham Əliyevin qarşıya qoyduğu tapşırıqlardan biri də  ADİU-nun dünya səviyyəli universitetlər sırasında olmasıdır. Biz bu istiqamətdə bütün gücümüzü səfərbər edərək, təhsil sahəsində həyata keçirilən islahatlarda öndə olmağa çalışırıq. “SABAH” qrupları haqqında məlumat verən rektor ali  təhsil üçün sabahın modeli olan bu layihədə Azərbaycan Dövlət İqtisad Universitetinin çox fəal iştirak etdiyini və birincilərdən olduğunu vurğuladı. “SABAH” qruplarına seçilmiş tələbələr də universitet seçimində ADİU-ya üstünlük veriblər.

 Rektor yeni təşəbbüslə çıxış edərək bildirdi ki, hər il Bilik Günündə yüksək bal toplamış tələbələrin Heydər Əliyev Mərkəzinə ekskursiyası təşkil ediləcək. Bir qrup tələbə isə Xəzər rayonunda xüsusi qayğıya ehtiyacı olanlar üçün yaradılmış “Ailə tipli kiçik qrup evi”nə səfər edərək,  onlara hədiyyələr aparacaq.

Əmək və əhalinin sosial müdafiəsi naziri Səlim Müslümov çıxışında 35 il öncə ilk dəfə bu universitetdə keçirdiyi tələbəlik illərinin təəssüratlarını bölüşdü. İqtisad Universitetinin bütün dövrlərdə nüfuzlu universitet olduğunu bildirdi və qeyd etdi ki,  bu universitetdə yaxşı oxuyan tələbələrə necə qiymət verildiyini bilmək üçün Azərbaycan hökumətinin tərkibinə nəzər salmaq kifayətdir.

Təhsil Nazirliyinin nümayəndəsi təhsildə əldə olunan uğurlardan danışaraq tələbələri yeni tədris ilinin başlanması münasibətilə təbrik edib, onlara uğurlar arzulayıb.

Tədbirin sonunda rektor və qonaqlar tərəfindən universitetə yüksək balla qəbul olunan gənclərə tələbə bileti və hədiyyələr təqdim edilib.

Daha sonra 600-dən çox bal toplamış tələbələr Heydər Əliyev Mərkəzini ziyarət ediblər. Ümummilli liderin həyatının müxtəlif dövrlərini əks etdirən eksponatlarla tanış olan tələbələr mərkəzdən zəngin təəssüratla ayrılıblar.

500-dən çox bal toplayan tələbələr isə “Ailə tipli kiçik qrup evi”ni ziyarət edərək, kimsəsiz uşaqlara hədiyyələr paylayıblar.

Elnarə ÖMƏROVA