Mingəçevirin ümumtəhsil məktəblərində şagirdlərin sevincinin həddi-hüdudu yox idi. Ən çox sevinən isə birincilər idi. Onların valideynləri də övladlarının sevincinə şərik idilər.

Çünki onların övladlarına dövlət tərəfindən göstərilən diqqət və qayğı danılmazdır. Prezidentin  Ehtiyat Fondundan ayrılan vəsait və dövlət büdcəsi hesabına mühüm sosial-infrastruktur layihələrinin həyata keçirildiyi Mingəçevir şəhərində orta ümumtəhsil məktəblərinin əsaslı təmir və bərpasına, maddi-texniki bazanın möhkəmləndirilməsinə xüsusi diqqət yetirilir. Hazırda energetiklər şəhərində bir necə məktəbdə təmir-bərpa işləri aparılır.

10 saylı   məktəb əsaslı təmir olunaraq şagird və müəllimlərin ixtiyarına verilib. Qeyd edək ki, bu təhsil ocağı ən müasir texnologiya əsasında qurulan 950 şagird yerlik məktəbdir.  4 saylı tam orta məktəb isə yaxın günlərdə istifadəyə veriləcək. 

Bilik Günü 10 saylı tam orta məktəbdə daha böyük coşqu ilə qeyd edildi. Məktəbin məzunu, millət vəkili Aydın Mirzəzadə, Mingəçevir Şəhər İcra Hakimiyyətinin başçısı Niyazi  Bayramov, icra hakimiyyəti başçısının müavini Ramiz Əliyev, şəhər təhsil şöbəsinin müdiri Sahib Məmmədov  əsaslı təmirdən sonra  məktəbdə yaradılan şəraitə baxış keçirdilər. Qonaqları şeir və gül dəstələri ilə qarşılayan balaca fidanlar  onlar üçün yaradılan bu gözəlliyə görə Prezidentimizə və şəhər rəhbərliyinə öz minnətdarlıqlarını bildirdilər.

Məktəbin direktoru mərasimdə çıxış edərək əvvəlcə ötən dərs ilində əldə olunan uğurlardan söz açdı. Diqqətə çatdırdı ki, məktəbdə müəllim-valideyn münasibətləri nə qədər sıx və mütəmadi olsa, balalarımıza o qədər effektli təhsil verə bilərik. Direktor xüsusilə birinciləri salamladı və onlara  yeni addımlarında uğurlar arzuladı. Daha sonra millət vəkili Aydın Mirzəzadə və icra başçısı Niyazi Bayramov çıxış edərək hər bir şagirdə xoş arzularını çatdırdılar. Bilik Günü şagirdlərin ifasında maraqlı rəqs nömrələri, şeirlər və kompozisiyalarla başa çatdı.

İlqar MUSAOĞLU,

“Xalq qəzeti”nin bölgə müxbiri