Sentyabrın 15-də – Bilik günündə “Kaspi” Təhsil Şirkətinin nəzdində yeni “Kaspi” liseyi fəaliyyətə başlayıb.

Liseyin açılışında çıxış edən “Kaspi” Təhsil Mərkəzinin təsisçisi Sona Vəliyeva bildirib ki, Azərbaycanın sürətli inkişafı təhsil sahəsində də bir çox uğurlar qazanılmasına şərait yaradıb. “Kaspi” təhsil şirkəti təhsil məkanında yeni deyil. Şirkət səkkiz ildir ki, fəaliyyət göstərir. Bu müddət ərzində iki minə yaxın magistr xarici ölkədə təhsil alıb. Eyni zamanda, məktəbəqədər təhsil müəssisəsində beş minə yaxın uşağa bilik öyrədilir. Məhz buna görə şirkətin nəzdində yeni liseyin açılmasına ehtiyac vardı. Liseydə əsasən milli və elektron təhsilin vəhdətini təşkil etməyə nail olduq. Liseydə, həmçinin təhsilin keyfiyyətini artırmaq məqsədi ilə müəllim heyətinin işi düzgün qurulub.

 S.Vəliyeva diqqətə çatdırıb ki, “Kaspi” liseyində şagirdlərdə bacarıq və qabiliyyətlərin formalaşdırılması, onların istedadının, intellektual və yaradıcı potensialının üzə çıxarılması, həmçinin müasir və keyfiyyətli təhsil almaları üçün əlverişli şərait yaradılıb. İntellektual, yaradıcı və cəmiyyətə töhfə verə biləcək nəslin yetişməsi üçün “Kaspi” liseyində xüsusi təlim-təhsil mühiti mövcuddur. Məktəb beynəlxalq təcrübədən yararlanaraq tədris prosesini dövlət standartlarına əsaslanan proqrama uyğun olaraq təşkil edir. Tədris Azərbaycan və rus dillərində aparılacaq. Məktəb müasir maddi-texniki bazaya malikdir. 

Sonra Milli Məclisin deputatları - Azərbaycan Milli Elmlər Akademiyası Tarix İnstitutunun direktoru Yaqub Mahmudov, Azərbaycan Həmkarlar İttifaqları Konfederasiyasının sədri Səttar Mehbalıyev, Sabunçu Rayon İcra Hakimiyyətinin başçısı Adil Vəliyev və başqaları çıxış edərək liseydə təhsil alacaq şagirdlərə uğurlar arzulayıblar.

 Tədbir bədii hissə ilə davam edib.

AzərTAc