Bakı Ali Neft Məktəbində (BANM) yeni tədris ilinin başlanması münasibətilə tədbir keçirilib. Tədbirdə çıxış edən BANM rektoru Elmar Qasımov bildirib ki, bu il məktəbə 3 ixtisas üzrə - neft-qaz mühəndisliyi, kimya mühəndisliyi və proseslərin avtomatlaşdırılması mühəndisliyi ixtisaslarına 120 tələbə qəbul olub.

 O  qeyd edib  ki, 2012-2013-cü tədris ilində bu ali təhsil ocağına qəbul üzrə keçid balı 631, 2013-2014-cü tədris ilində 656, 2014-2015-ci tədris ilində isə 668 bal təşkil edib. Rektorun sözlərinə görə, builki nəticə Azərbaycanda tələbə qəbulu üzrə ən yüksək göstəricidir.  E.Qasımov vurğulayıb ki, bu tədris ilində BANM-yə qəbul olan abituriyentlərin 17-si Prezident təqaüdünə layiq görülüb.

Tədbirdə çıxış edən Azərbaycan Dövlət Neft Şirkətinin prezidenti Rövnəq Abdullayev tələbələri təbrik edərək, gələcək təhsillərində uğurlar arzulayıb. O vurğulayıb ki, qısa müddət ərzində ali məktəbin infrastrukturunun yaradılması, kadr potensialının formalaşdırılması istiqamətində böyük işlər görülüb və bunun nəticəsi olaraq yüksək nəticələr əldə olunub. Ölkədə müxtəlif dövrlərdə neft sahəsi üzrə ixtisaslı kadrların hazırlanmasına ehtiyac olduğunu deyən R.Abdullayev diqqətə çatdırıb ki,  bu ali təhsil ocağında hazırlanan mütəxəssislər, mühəndislər gələcəkdə ölkənin neft sahəsinin inkişafına uğurlu töhfələr verə biləcək.

Tələbə Qəbulu üzrə Dövlət Komissiyasının sədri Məleykə Abbaszadə və Böyük Britaniyanın Heriot-Vatt Universitetinin Neft Mühəndisliyi İnstitutunun professoru Con Ford çıxışlarında BANM-ın əldə etdiyi müsbət göstəricilərə bir daha nəzər salmış, tələbələrə yeni dərs ilində uğurlar arzulamışlar.

Tədbirin sonunda BANM-ın ilkin hazırlıq ilini uğurla bitirən tələbələrə Heriot-Vatt Universitetinin tələbə vəsiqələri, həmçinin yeni qəbul olunanlara tələbə biletləri təqdim edilib.

“Xalq qəzeti”