Sumqayıtdakı Heydər Əliyev Mərkəzində ali məktəblərə qəbul imtahanlarında 600-dən yuxarı bal toplayaraq tələbə adını qazanmış gənclərlə görüş keçirilib.

Şəhər icra hakimiyyətinin təşəbbüsü ilə gənclər və idman baş idarəsinin təşkil etdiyi görüşdən əvvəl iştirakçılar ulu öndərin həyat və fəaliyyətinin ən maraqlı anlarını əks etdirən eksponatlarla tanış oldular.

Gənclər və idman baş idarəsinin rəisi Musa Həsənov görüşü açaraq yüksək nəticələri ilə hər kəsi sevindirən gəncləri təbrik etdi. O  bildirdi ki, müstəqil Azərbaycan dövlətinin memarı və qurucusu Heydər Əliyev tərəfindən əsası qoyulmuş gənclər siyasəti Prezident İlham Əliyevin rəhbərliyi ilə məqsədyönlü şəkildə davam etdirilir. Ölkəmizdə təhsilin inkişafına xüsusilə böyük önəm verilir. Elə sumqayıtlı gənclərin uğurlarının ilbəil artması həmin diqqət və qayğının nəticəsidir. Bu il ali məktəblərə sənəd verən gənclərin 60,1 faizi sınaqdan müvəffəqiyyətlə keçib. Şəhər təhsil şöbəsinin tabeliyində olan məktəblərin 129, özəl türk liseyinin isə 8 məzunu 600-dən yuxarı balla tələbə adını qazanıb. Onlardan 47 nəfəri 650-dən yuxarı bal toplayıb. Cari tədris ilində Azərbaycan Respublikasının Prezidentinin təqaüdünə layiq görülmüş 102 nəfərdən 10-u sumqayıtlıdır. Hazırda Sumqayıt məktəblərinin məzunu olan 94 tələbə həmin təqaüdü alır.

Təhsil şöbəsi müdirinin əvəzi Vaqif Ələkbərov  belə bir unudulmaz görüşün təşkilindən razılığını bildirdi, tələbələrə ən xoş arzularını çatdırdı. “Qartal” tikinti firmasının direktor müavini Tural Məmmədov yüksək uğur əldə etmiş tələbələrə hədiyyələr təqdim etdi.

Gənclər göstərilən diqqətə görə minnətdarlıq duyğularını ifadə etdilər və etimadı davamlı uğurları ilə doğruldacaqlarına söz verdilər.

 Əli ƏLİYEV,

“Xalq qəzeti”