Prezident İlham Əliyevin tapşırığına əsasən, icra hakimiyyəti orqanlarının rəhbərləri bölgələrdə vətəndaşların qəbulunu keçirir, onların müxtəlif məsələlərlə bağlı müraciətlərinin həllinə kömək göstərirlər.

Sentyabrın 11-də Tələbə Qəbulu üzrə Dövlət Komissiyasının (TQDK) sədri Məleykə Abbaszadə Naftalan şəhərində vətəndaşları qəbul edib.

Heydər Əliyev Mərkəzində keçirilən qəbulda Naftalan və Mingəçevir şəhərləri ilə yanaşı, Goranboy rayonundan olan vətəndaşlar da iştirak ediblər.

Müraciətlər əsasən ali təhsil müəssisələrinə, həmçinin tam və ümumi orta təhsil bazasında orta ixtisas təhsili müəssisələrinə qəbulla bağlı olub. Bəzi vətəndaşlar isə ali təhsil müəssisələrində təhsil alan övladlarının təhsil haqlarının ödənilməsində yaranmış problemlərlə əlaqədar müraciət ediblər.

TQDK-nın sədri vətəndaşları diqqətlə dinləyərək, müraciətlərin bəzilərini yerindəcə həll edib, bəzi məsələlərlə bağlı məsləhətlər verib. Bir sıra müraciətlər isə araşdırılması üçün nəzarətə götürülüb. Bu qurumun səlahiyyətlərinə aid olmayan məsələlərlə əlaqədar edilən müraciətlər isə baxılması və müvafiq tədbirlərin görülməsi üçün qeydiyyata alınıb.

AzərTAc