Qətər Dövləti Səhiyyə Nazirliyinin nümayəndə heyəti Azərbaycan Tibb Universitetində (ATU) olub.

Azərbaycan Tibb Universitetindən  bildiriblər ki, görüşdə bu ali məktəbin rektoru, Milli Məclisin deputatı, akademik Əhliman Əmiraslanov ATU-nun fəaliyyəti, klinikaları və s. barədə məlumat verib.

ATU-da təhsilin inkişafı üçün reallaşdırılan tədbirlərdən danışan rektor hər il universitetə 1000-ə yaxın tələbənin qəbul olunduğunu diqqətə çatdırıb. Qeyd edilib ki, hazırda təhsil müəssisəsinin 7 mindən çox tələbəsi var və onlardan təxminən 1100 nəfəri xarici ölkələrin vətəndaşıdır. 

Akademik Ə.Əmiraslanov, həmçinin ATU-nun müasir tibb avadanlıqları ilə təchiz olunmuş 4 klinikasının fəaliyyət göstərdiyini, həmin klinikalarda həm tədris prosesinin həyata keçirildiyini, həm də əhaliyə keyfiyyətli tibb xidməti göstərildiyini bildirib.

Qətər Dövləti Səhiyyə Nazirliyinin nümayəndələri ölkələrində tibb təhsilinin səviyyəsi barədə danışıblar.

Səhiyyə nazirinin müavini doktor Faleh Mohamed Hussain Ali müvafiq sahədə əməkdaşlığın əhəmiyyətini vurğulayıb.

Gələcəkdə ATU ilə Qətər Dövlətinin Səhiyyə Nazirliyi arasında qarşılıqlı əməkdaşlığa dair müqavilənin imzalanacağına dair ilkin razılıq əldə olunub.

Görüşdə ATU-nun elmi işlər üzrə prorektoru İbrahim İsayev, Beynəlxalq əlaqələr şöbəsinin müdiri Rəhimə Qabulova, tədris hissə müdiri Nəsimi Qasımov iştirak ediblər.

Sonra qonaqlar Azərbaycan Tibb Universiteti klinikalarının fəaliyyəti ilə tanış olublar.

AzərTAc