Səbail Rayon İcra Hakimiyyəti Başçısı yanında Şuranın geniş iclasında keçən tədris ilinin yekunları və yeni  təhsil ilinə hazırlığın vəziyyəti müzakirə olunmuşdur.

Toplantıda çıxış edən Səbail Rayon İcra Hakimiyyətinin başçısı Asif  Əsgərov ölkədə təhsil məsələləri ilə bağlı görülən işlərdən, Prezident İlham Əliyevin və ölkənin birinci xanımı, Heydər Əliyev Fondunun rəhbəri, millət vəkili Mehriban xanım Əliyevanın sahənin inkişafına olan diqqət və qayğısından danışmışdır.

Natiq qeyd etmişdir ki, Bakı şəhərinin  mərkəzi rayonu Səbaildə təhsilin vəziyyəti, orta məktəblərdə şagirdlər üçün  hər cür şəraitin yaradılması, sahənin maddi-texniki bazalarının yaxşılaşdırılması daim diqqət mərkəzində olumuşdur. Rayonda  5 ali, 18 orta və 18 məktəbəqədər təhsil müəssisəsi mövcuddur ki, onların yeni dərs ilinə hazırlığına və yay mövsümündə aparılan təmir işlərinə RİH ciddi nəzarət etmişdir.

3 il ərzində ölkə başçısının imzaladığı Sərəncam və Dövlət Proqramlarına əsasən rayondakı orta və məktəbəqədər təhsil müəssisələrinin böyük əksəriyyəti əsaslı təmir olunmuş, 1 yeni orta məktəb və 1 yeni uşaq bağçası tikilmiş, 2 orta məktəb, 1 uşaq musiqi məktəbi sökülərək yenidən tikilmişdir. 2 məktəb üçün yeni əlavə korpus tikilmiş, 1 peşə, 11 orta, 2 uşaq musiqi məktəbi, 2 uşaq texniki yaradıcılıq mərkəzi, 8 uşaq bağçası əsaslı təmir olunmuşdur.

Keçən il həmçinin Heydər Əliyev Fondunun təşəbbüsü ilə Badamdar qəsəbəsindəki 136 saylı körpələr evi-uşaq bağçasında əsaslı təmir işləri aparılmış və  sentyabr ayında Azərbaycanın birinci xanımı Mehriban Əliyeva və qızı Arzu Əliyevanın iştirakı ilə açılışı keçirilmişdir.

Heydər Əliyev Fondu nəcib təşəbbüs göstərərək bu ilin aprel ayında Badamdardakı “Könül” körpələr evi-uşaq bağçasında əsaslı təmir işlərinə başlamış və artıq  burada işlər başa çatdırılmışdır. 

 “2014-2016-cı illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın həyata keçirilməsi üzrə Tədbirlər Planına uyğun olaraq Səbail rayonunun təhsil müəssisələri üzrə 3 orta və 1 musiqi məktəbinin və 3 uşaq bağçasının əsaslı təmiri nəzərdə tutulmuşdur.

Asif Əsgərov  bildirmişdir ki, rayonda təhsilin səviyyəsi və təhsil müəssisələrinin vəziyyətinə RİH tərəfindən ciddi fikir verilir. Yay aylarında təhsil müəssisələrində təmir işləri aparılmış, məktəblər lazımi avadanlıq və vəsaitlərlə təmin olunmuşlar.

Toplantıda son bir ildə orta və ali məktəblərdə təhsilin səviyyəsinin günümüzün tələblərinə uyğun olaraq qurulması, şagird və tələbələrin savadlı və bilikli, vətənpərvər ruhda tərbiyə olunması istiqamətində   həyata keçirilən işlər barədə də geniş söz açılmışdır. Bildirilmişdir ki, bu il rayonun orta məktəblərini 1355 nəfər bitirmiş, onlardan 1190 nəfəri ali məktəblərə sənəd vermişdir. Abituriyentlərin 901 nəfəri tələbə adını qazanmışdır. 124  nəfər 500-dən, 37 nəfər 600-dən, 9 nəfər isə 650-dən çox bal toplamışdır.  7 səbailli gənc qızıl və 2 şagird gümüş medala layiq görülmüşdür. Son 4 ildə isə rayonun məzunları, ümumilikdə  43 qızıl və  3 gümüş medala layiq görülmüşlər.

91 saylı tam orta məktəbin direktoru Svetlana Zülfüqarova, 687 bal toplayaraq tələbə adını qazanmış Xalid Məmmədli və digər çıxışçılar  təhsil müəssisələrində yaradılan şəraitə, göstərdikləri diqqət və qayğıya görə Prezident İlham Əliyevə və birinci xanım Mehriban Əliyevaya minnətdarlıqlarını bildirmişlər.

Sonda təqaüdə çıxmış 3 məktəb direktoru təntənəli surətdə istirahətə yola salınmışdır. Qəbul imtahanlarında yüksək nəticələr göstərmiş məzunlara Səbail Rayon İcra Hakimiyyətinin qiymətli hədiyyələri təqdim olunmuşdur. Qarabağ müharibəsi əlilləri, veteranları, şəhid və  aztəminatlı ailələrdən olan 100 uşağa isə məktəbli forması hədiyyə olunmuşdur.

R.TAHİR,

“Xalq qəzeti”