Dünən Nəsimi Rayon İcra Hakimiyyətində ali məktəblərə qəbul imtahanlarında yüksək bal toplamış məzunlarla görüş keçirildi. Tədbiri açan rayon icra hakimiyyəti başçısının  müavini Gülarə Verdiyeva əvvəlcə RİH başçısı Nəsib Məhəməliyevin adından iştirakçıları salamladı.

Natiq rayon təhsil müəəssisələrində görülən təmir, abadlıq və quruculuq işlərindən danışaraq diqqətə çatdırdı ki, rayon ərazisində fəaliyyət göstərən  29 ümumtəhsil məktəbinin 15-də yeni korpus tikilmişdir.

“2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nın icrası ilə əlaqədar 46, 54 saylı tam orta məktəbində, Bakı Slavyan Universitetinin nəzdində fəliyyət göstərən məktəb-lisey kompleksində əsaslı təmir işləri başa çatdırılmışdır.

“2014 -2016-cı illərdə Bakı şəhərinin və onun ətraf qəsəbələrinin sosial-iqtisadi inkişafına dair Dövlət Proqramı”nın icrası ilə əlaqədar 23 saylı tam orta məktəb sökülərək yerində müasir tələblərə cavab verən yeni məktəb binası inşa edilmişdir.

Tədbirdə qeyd olundu ki, bu il rayon üzrə 1796 nəfər məktəbi bitirmişdir. Bunlardan 1118 nəfər ali məktəblərə qəbul olunmuşdur. 44 məzun 600-dən çox, 12 məzun isə 650-dən çox bal toplamışdır. 54 saylı tam orta məktəbi qızıl medalla bitirmiş Namiq Məmmədov isə qəbul imtahanında 677 bal toplayaraq bu medala layiq olduğunu sübut etmişdir.

G.Verdiyeva ali məktəblərə yüksək balla daxil olan məzunları təbrik edərək onlara gələcək həyatlarında yeni-yeni nailiyyətlər  dilədi. O, məzunların diqqətinə çatdırdı ki, həyat qabaqdadır. Onları qarşıda kəşməkəşli tələbəlik illəri gözləyir. Yalnız bugünkü müvəffəqiyyətlə kifayətlənmək olmaz. Bundan da yüksək uğurlara nail olmaq üçün bilik və bacarıqlarını daim inkişaf etdirməlidirlər.

Gülarə Verdiyeva xüsusi vurğuladı ki, təkcə son iki ayda Prezident cənab İlham Əliyev beş dəfə Nəsimi rayonunda olmuş, müxtəlif məktəblərdə aparılmış əsaslı təmir işləri və ya yenidən tikilmiş məktəb binaları ilə tanış olmuşdur. Bu yüksək diqqət və qayğıya görə ölkə başçısı İlham Əliyevə və birinci xanım Mehriban Əliyevaya minnətdarlığını bildirən G.Verdiyeva bunun rayon təhsil işçilərinə böyük mənəvi stimul verəcəyini qeyd etdi.

Tədbirdə çıxış edən Bakı Şəhər Təhsil İdarəsinin müdir müavini Hüseyn Əsgərov öz növbəsində yüksək balla ali məktəblərə qəbul olunan məzunları təbrik etdi və onlara gələcək müstəqil həyatlarında uğurlar arzuladı.

Qeyd olundu ki, həftəsonu Nəsimi rayonundakı aztəminatlı ailələrə və valideyn himayəsindən məhrum olmuş uşaqlara məktəbli formaları və dərs ləvazimatları veriləcəkdir.

Daha sonra  ən yüksək bal toplamış tələbələrə söz  verildi. 680 bal toplamış Elitar Gimnaziyanın məzunu Zakir  Əlizadə qazandığı uğurlara görə məzunu olduğu tədris müəssisəsinin kollektivinəminnətarlığını bildirdi. 9 saylı tam orta məktəbin məzunu 664 bal toplamış Səbinə İsayeva da  qazandığı nailiyyətlərə görə müəllimlərinə və valideynlərinə borclu olduğunu bildirdi.

Sonda 650-dən çox bal toplamış 12 nəfər məzuna müxtəlif hədiyyələr və mükafatlar verildi.

Elçin ABBASOV,

“Xalq qəzeti”