Zaqatala Rayon Mədəniyyət evində bu il ali məktəblərə qəbul olunmuş məzunlarla görüş keçirilmişdir.

Görüşdə çıxış edən Zaqatala Rayon İcra Hakimiyyətinin başçısı Mübariz Əhmədzadə bu il qəbul imtahanları zamanı tələbə adını qazanmış gəncləri bu şərəfli ada layiq görülmələri münasibəti ilə təbrik etmiş, onlara təhsildə uğurlar arzulamışdır. Sonra natiq ümummilli liderimiz Heydər Əliyevin hakimiyyətə qayıdışından sonra respublikamızda  bütün sahələrdə olduğu kimi təhsil sistemində də geniş islahatlar aparıldığını, hazırda bu siyasətin Azərbaycan Respublikasının Prezidenti cənab İlham Əliyev tərəfindən uğurla davam etdirildiyini qeyd etmiş, bu sahənin inkişafı ilə bağlı ölkə rəhbəri tərəfindən mühüm sərəncamların imzalandığını, təhsilin maddi-texniki bazasının möhkəmləndirilməsi istiqamətində ardıcıl tədbirlərin həyata keçirildiyini qeyd etmişdir. 

Daha sonra rayon rəhbəri qazanılan uğurlardan və qarşıda duran problemlərdən danışmış, onların həlli istiqamətində görüləcək işlərdən geniş söhbət açmışdır.

Tədbirdə çıxış edənlər bu il Zaqatala rayonundan 475 məzunun ali məktəblərə qəbul imtahanlarında iştirak etdiyini, onlardan 301 nəfərinin tələbə adını qazandığını, 37 nəfərin 500-dən, 18 nəfərin 600-dən çox bal topladığını bildirmişlər.

Natiqlər, respublikamızda təhsilə göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevaya təşəkkürlərini bildirmişlər.

Yekunda ali məktəblərə qəbul olunmuş gənclərə xatirə hədiyyələri verilmişdir.

İlqar HƏSƏNOV,

“Xalq qəzeti”nin bölgə müxbiri