Sumqayıt Şəhər Gənclər və İdman Baş İdarəsində xarici ölkələrdə ali təhsil alan gənclərin bir qrupu ilə görüş keçirilib.  

Baş idarənin rəisi Musa Həsənov azərbaycanlı gənclərin xarici ölkələrdə təhsili tarixindən danışaraq keçən əsrin 70-80-ci illərində ulu öndər Heydər Əliyevin bu sahədəki misilsiz xidmətlərindən söz açıb. O, Azərbaycan  Prezidenti cənab İlham Əliyevin bu sahəyə xüsusi diqqət yetirdiyini, dövlət başçısının 16 aprel 2007-ci il tarixli  sərəncamı ilə təsdiq edilmiş “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində hər il gənclərin xarici ölkələrin nüfuzlu ali təhsil ocaqlarında oxumasına şərait yaradıldığını vurğulayıb. Qeyd edib ki, sumqayıtlı məzunlar da bu imkandan lazımınca bəhrələnir və etimadı doğruldurlar.

Geniş fikir mübadiləsi şəraitində keçən görüşdə xarici ölkələrdə yaşayan sumqayıtlı gənclər haqqında informativ kitabın nəşr edilməsi, onlarla əlaqələrin gücləndirilməsi ilə bağlı təkliflər səslənib. Çin Xalq Respublikasında təhsil alan Allahverdi Şahverənov və Əhməd Əsgərov bu ölkədə Azərbaycanın təbliği istiqamətində gördükləri işlər barədə məlumat veriblər.

Görüş iştirakçıları diqqətə görə Sumqayıt şəhər rəhbərliyinə dərin minnətdarlıq hisslərini ifadə ediblər.

Sonda xaricdə ali təhsil alan gənclərə baş idarənin nəşrləri təqdim  olunub.

Əli NƏCƏFXANLI,

“Xalq qəzeti”